വെല്ലിങ്ടണ്‍: ഉത്തേജക മരുന്ന് ഉപയോഗിച്ചതിനെ തുടര്‍ന്ന് ന്യൂസിലന്‍ഡ് പേസര്‍ ബ്രേസ്വെല്ലിന് വിലക്ക്. നിരോധിത ലഹരിവസ്തുവായ കൊക്കെയ്ന്‍ ഉപയോഗിച്ചതായി കണ്ടെത്തിയതിനെ തുടര്‍ന്നാണ് നടപടി. ന്യൂസിലന്‍ഡിലെ ആഭ്യന്തര ടി20 ലീഗായി സൂപ്പര്‍ സ്മാഷില്‍ ഈ വര്‍ഷം ജനുവരിയില്‍ നടന്ന സെന്‍ട്രല്‍ സ്റ്റാഗ്സ് – വെല്ലിങ്ടണ്‍ ഫയര്‍ബേര്‍ഡ്സ് മത്സരത്തിനു ശേഷം നടത്തിയ ശാസ്ത്രീയ പരിശോധനയിലാണ് 34-കാരന്‍ കൊക്കെയ്ന്‍ ഉപയോഗിച്ചതായി കണ്ടെത്തിയത്. മത്സരത്തില്‍ 21 റണ്‍സ് വഴങ്ങി രണ്ടു വിക്കറ്റ് വീഴ്ത്തുകയും 11 പന്തില്‍ നിന്ന് 30 റണ്‍സ് നേടുകയും ചെയ്ത ബ്രേസ്വെല്‍ കളിയിലെ താരമാകുകയും ചെയ്തിരുന്നു.
ന്യൂസിലന്‍ഡ് സ്പോര്ട്സ് ഇന്റഗ്രിറ്റി കമ്മിഷനാണ് താരത്തിന് വിലക്കേര്‍പ്പെടുത്തിയത്. കമ്മിഷന്റെ ഹിയറിങ്ങില്‍ കൊക്കെയ്ന്‍ ഉപയോഗിച്ചതായി താരം സമ്മതിച്ചിരുന്നു. എന്നാല്‍ മത്സരദിവസത്തിനു മുമ്പായിരുന്നു ഉപയോഗമെന്നും താരം കമ്മിഷനെ അറിയിച്ചിരുന്നു. ഒടുവില്‍ ബ്രേസ്വെല്ലിന്റെ വാദങ്ങള്‍ അംഗീകരിച്ച കമ്മിഷന്‍ ആദ്യം മൂന്ന് മാസത്തെ വിലക്കാണ് ഏര്‍പ്പെടുത്തിയത്. എന്നാല്‍ പിന്നീട് ലഹരി ഉപയോഗം ഒഴിവാക്കുന്നതിനുള്ള പ്രത്യേക ചികിത്സയ്ക്ക് വിധേയനായതിനെ തുടര്‍ന്ന് വിലക്ക് ഒരു മാസമായി കുറയ്ക്കുകയായിരുന്നു.