പാരിസ്: ഒളിംപിക്സില് വനിതകളുടെ വേഗ റാണിയായി ജൂലിയന് ആല്ഫ്രഡ്. കരീബിയന് ദ്വീപ് രാജ്യമായ സെന്റ് ലൂസിയന് താരമാണ് ജൂലിയന്. പാരിസ് ഒളിംപിക്സ് വനിതാ 100 മീറ്റര് ഫൈനലിലാണ് ജൂലിയന്റെ സ്വര്ണ മെഡല് നേട്ടം. യുഎസിന്റെയും ജമൈക്കയുടെയും കുത്തക തകര്ത്ത് സെന്റ് ലൂസിയയുടെ വരവ്. 10.72 സെക്കന്ഡില് ഫിനിഷ് ചെയ്ത ആല്ഫ്രഡ് രണ്ടാംസ്ഥാനത്തേക്ക് പിന്തള്ളിയത് നിലവിലെ ലോക ചാംപ്യന് യുഎസിന്റെ ഷാകെറി റിച്ചഡ്സനെ (10.87 സെക്കന്ഡ്)യാണ്. മറ്റൊരു യുഎസ് താരം മെലിസ ജെഫേഴ്സനാണ് വെങ്കലം (10.92 സെക്കന്ഡ്). സെന്റ് ലൂസിയയുടെ ആദ്യ ഒളിംപിക്സ് മെഡല് നേട്ടമാണ്.
ഷാകെറിയുടെയും ജമൈക്കയുടെ ഷെല്ലി ആന് ഫ്രേസറും തമ്മിലുള്ള സൂപ്പര് പോരാട്ടം പ്രതീക്ഷിച്ചാണ് ആരാധകര് 100 മീറ്റര് ഫൈനലിന് എത്തിയത്. എല്ലാ കണക്കുകൂട്ടലുകളും തെറ്റിച്ചാണ് ഇരുപത്തിമൂന്നുകാരി ജൂലിയന് ആല്ഫ്രഡിന്റെ കുതിച്ചോട്ടം. 2 തവണ ഒളിംപിക്സ് ചാംപ്യനായ ഷെല്ലി ആന് ഫ്രേസര് സെമിഫൈനല് മത്സരത്തിനു മുന്പേ പിന്മാറിയതോടെ എല്ലാവരുടെയും കണ്ണുകള് ഷാകെറിയിലേക്കു മാത്രമായിയിരുന്നു. എന്നാല് ആദ്യ സെമിഫൈനലില് ഷാകെറിയെ രണ്ടാംസ്ഥാനത്തേക്ക് പിന്തള്ളി ജൂലിയന് ഒന്നാമതെത്തി. ഇത് ജൂലിയന്റെ വരാനിരിക്കുന്ന കൊടുങ്കാറ്റിന്റെ സാമ്പിള് ആയിരുന്നു. 10.84 സെക്കന്ഡില് ഫിനിഷ് ചെയ്ത ആല്ഫ്രഡ് സെമിയിലെ ഏറ്റവും മികച്ച സമയത്തോടെയാണ് ഫൈനലിലേക്കു മുന്നറിയത്.
കരിയറിലെ ഏറ്റവും മികച്ച സമയം കുറിച്ചാണ് ജൂലിയന് ആദ്യ ഒളിംപിക്സ് സ്വര്ണം കഴുത്തിലണിഞ്ഞത്.3 യുഎസ് താരങ്ങളും ഒരു ജമൈക്കന് താരവും അണിനിരന്ന ഫൈനലില് തുടക്കം മുതല് വ്യക്തമായ ലീഡെടുത്തു കുതിച്ചാണ് ജൂലിയന് ആല്ഫ്രഡ് സ്വര്ണവര തൊട്ടത്. സ്റ്റാര്ട്ടിങ്ങില് പാളിച്ച നേരിട്ട ഷാകെറി തുടര്ന്ന് അതിവേഗം ഓടിക്കയറിയെങ്കിലും ജൂലിയനൊപ്പമെത്താനായില്ല.
അവസാന ഒളിംപിക്സിനെത്തിയ ജമൈക്കന് സൂപ്പര്താരം ഷെല്ലി ആന് ഫ്രേസറുടെ അപ്രതീക്ഷിത പിന്മാറ്റത്തെച്ചൊല്ലിയുള്ള നാടകീയതകളോടെയാണ് മത്സരം തുടങ്ങിയത്. മികച്ച രണ്ടാമത്തെ സമയത്തോടെ ഹീറ്റ്സില് നിന്നു മുന്നേറിയ ഷെല്ലി സെമിയില് മത്സരിച്ചിരുന്നില്ല. മത്സരത്തിന് മുന്പ് വാംഅപ്പിനായി സ്വകാര്യ വാഹനത്തില് ഗ്രൗണ്ടിലേക്ക് എത്തിയ ഷെല്ലിക്ക് സംഘാടകര് സ്റ്റേഡിയത്തില് പ്രവേശനം അനുവദിച്ചില്ലെന്നും ഇതില് പ്രതിഷേധിച്ചാണ് താരത്തിന്റെ പിന്മാറ്റമെന്നുമാണ് റിപ്പോര്ട്ട്.