ന്യൂഡല്‍ഹി: ഐഎസ്എല്ലില്‍ പഞ്ചാബ് എഫ്‌സിക്കെതിരെ കേരള ബ്ലാസ്റ്റേഴ്‌സിന് ഏകപക്ഷീയമായ ഒരു ഗോളിന്റെ വിജയം. 44ാം മിനിറ്റില്‍ മൊറോക്കന്‍ താരം നോവ സദൂയിയാണു ബ്ലാസ്റ്റേഴ്‌സിനെ മുന്നിലെത്തിച്ചത്. ഒടുവില്‍ കളിച്ച അഞ്ച് മത്സരങ്ങളില്‍ നാലും തോറ്റ ബ്ലാസ്റ്റേഴ്‌സിന് ഞായറാഴ്ചത്തെ പോരാട്ടത്തില്‍ ജയം അനിവാര്യമായിരുന്നു.രണ്ടാം പകുതിയിലെ നാടകീയമായ ചുവപ്പുകാര്‍ഡുകളും ഡല്‍ഹിയിലെ കൊടും തണുപ്പിനെയും മറികടന്നാണ് മഞ്ഞപ്പടയുടെ ജയം.
42ാം മിനിറ്റില്‍ കേരള ബ്ലാസ്റ്റേഴ്‌സിന്റെ നോവ സദൂയിയെ പഞ്ചാബിന്റെ സുരേഷ് മെയ്‌തെയ് ഫൗള്‍ ചെയ്തതിനാണു റഫറി പെനാല്‍റ്റി അനുവദിച്ചത്. കിക്കെടുക്കാനെത്തിയ സദൂയി പിഴവുകളില്ലാതെ പന്ത് വലയിലെത്തിച്ചതോടെ ബ്ലാസ്റ്റേഴ്‌സ് ഒരു ഗോളിനു മുന്നിലെത്തി.രണ്ടാം പകുതിയിലാണ് ബ്ലാസ്റ്റേഴ്‌സിന് വലിയ പരീക്ഷണങ്ങള്‍ നേരിടേണ്ടിവന്നത്. 57ാം മിനിറ്റില്‍ പഞ്ചാബിന്റെ മലയാളി താരം ലിയോണ്‍ അഗസ്റ്റിനെ വീഴ്ത്തിയതിന് ബ്ലാസ്റ്റേഴ്‌സിന്റെ മിലോസ് ഡ്രിന്‍കിച്ച് രണ്ടാം യെല്ലോ കാര്‍ഡ് കണ്ടു പുറത്തായി. 74ാം മിനിറ്റില്‍ ബ്ലാസ്റ്റേഴ്‌സിന്റെ അയ്ബന്‍ബ ഡോലിങ്ങും ചുവപ്പു കാര്‍ഡ് കണ്ടു. ലിയോണ്‍ അഗസ്റ്റിനെ അപകടകരമായ രീതിയില്‍ ഫൗള്‍ ചെയ്തതിനായിരുന്നു റഫറിയുടെ നടപടി.
ഇതോടെ അവസാന 15 മിനിറ്റില്‍ ബ്ലാസ്റ്റേഴ്‌സിന് ഒന്‍പതു പേരുമായി കളിക്കേണ്ടിവന്നു. ഏഴു മിനിറ്റാണ് മത്സരത്തിന് അധിക സമയമായി റഫറി നല്‍കിയത്. അവസരം മുതലാക്കി സമനില പിടിക്കാന്‍ പഞ്ചാബ് പരമാവധി ശ്രമിച്ചെങ്കിലും ബ്ലാസ്റ്റേഴ്‌സ് പ്രതിരോധവും ഗോളി സച്ചിന്‍ സുരേഷും ഗോള്‍ വഴങ്ങാതെ പിടിച്ചുനിന്നു. ഇതോടെ ബ്ലാസ്റ്റേഴ്‌സിന് സീസണിലെ അഞ്ചാം വിജയം.15 മത്സരങ്ങള്‍ പൂര്‍ത്തിയാക്കിയ കേരള ബ്ലാസ്റ്റേഴ്‌സ് 17 പോയിന്റുകളുമായി ഒന്‍പതാം സ്ഥാനത്താണ്. 13 കളികളില്‍നിന്ന് 18 പോയിന്റുമായി പഞ്ചാബ് എട്ടാം സ്ഥാനത്താണ്. 13ന് ഒഡിഷയ്‌ക്കെതിരെ കൊച്ചിയിലാണ് ബ്ലാസ്റ്റേഴ്‌സിന്റെ അടുത്ത മത്സരം.