ഇത്തിഹാദ്: ഇംഗ്ലിഷ് പ്രീമിയര്‍ ലീഗില്‍ മാഞ്ചസ്റ്റര്‍ സിറ്റിക്ക് തോല്‍വി. ബ്രിങ്ടണെതിരേ 2-1ന്റെ തോല്‍വിയാണ് പെപ്പ് ഗ്വാര്‍ഡിയോളയുടെ ശിഷ്യന്‍മാര്‍ വഴങ്ങിയത്. 23ാം മിനിറ്റില്‍ എര്‍ലിങ് ഹാലന്റിലൂടെ ലീഡെടുത്ത ശേഷമാണ് സിറ്റിയുടെ തോല്‍വി. രണ്ടാം പകുതിയില്‍ ജാവോ പെഡ്രോയും (78) ഓറിലേയും (83) ആണ് ബ്രിങ്ടണ്‍ന്റെ ഗോള്‍ നേടിയത്. മാഞ്ചസ്റ്റര്‍ സിറ്റിയുടെ തുടര്‍ച്ചയായ നാലാം തോല്‍വിയാണിത്.
2006ന് ശേഷം ആദ്യമായാണ് മാഞ്ചസ്റ്റര്‍ സിറ്റി തുടര്‍ച്ചയായ നാല് മല്‍സരങ്ങള്‍ പരാജയപ്പെടുന്നത്. ലീഗില്‍ അവര്‍ രണ്ടാം സ്ഥാനത്താണ്. ഇന്ന് നടന്ന മറ്റൊരു മല്‍സരത്തില്‍ ആസ്റ്റണ്‍ വില്ലയ്‌ക്കെതിരേ ഒന്നാം സ്ഥാനത്തുള്ള ലിവര്‍പൂള്‍ എതിരില്ലാത്ത രണ്ട് ഗോളിന് ജയിച്ചു. ഡാര്‍വിന്‍ ന്യൂനസും മുഹമ്മദ് സലാഹുമാണ് ലിവര്‍പൂളിന്റെ സ്‌കോറര്‍മാര്‍. നാളെ നടക്കുന്ന മല്‍സരങ്ങളില്‍ ചെല്‍സി ആഴ്‌സണലിനെയും മാഞ്ചസ്റ്റര്‍ യുനൈറ്റഡ് ലെസ്റ്ററിനെയും നേരിടും.