സാവോപോളോ: ലാറ്റിന്‍ അമേരിക്കന്‍ ലോകകപ്പ് യോഗ്യതാ മല്‍സരത്തില്‍ മുന്‍ പവര്‍ ഹൗസുകളായ ബ്രസീലിന് പരാജയം. പരാഗ്വെയോട് ഏകപക്ഷീയമായ ഒരു ഗോളിനാണ് മഞ്ഞപ്പടയുടെ തോല്‍വി. കഴിഞ്ഞ മല്‍സരത്തില്‍ ഇക്വഡോറിനോട് കഷ്ടിച്ച് ഒരു ഗോളിന് രക്ഷപ്പെട്ട ബ്രസീലിന് ഇന്ന് കഴിഞ്ഞ മല്‍സരത്തിലെ പ്രകടനം പോലും പുറത്തെടുക്കാനായില്ല. ഡിഗോ ഗോമസാണ് 20ാം മിനിറ്റില്‍ പരാഗ്വെയ്ക്കായി സ്‌കോര്‍ ചെയ്തത്.പോയിന്റ് നിലയില്‍ ബ്രസീല്‍ അഞ്ചാം സ്ഥാനത്തും പരാഗ്വെ ഏഴാം സ്ഥാനത്തുമാണ്.
പരാഗ്വെയ്ക്കെതിരെ ബ്രസീലിന് മുന്‍തൂക്കമുണ്ടായിരുന്നെങ്കിലും ഗോള്‍ നേടാന്‍ മാത്രം സാധിച്ചില്ല. ലോകകപ്പ് യോഗ്യതയില്‍ എട്ടില്‍ നാല് മത്സരങ്ങളും ബ്രസീല്‍ തോറ്റു. മൂന്ന് ജയം ഒരു സമനില. സൂപ്പര്‍ താരങ്ങളുണ്ടായിട്ടും പരിതാപകരമാണ് ബ്രസീലിന്റെ അവസ്ഥ.
മറ്റ് മല്‍സരങ്ങളില്‍ ബൊളീവിയ ചിലിയെ 2-1നും ഇക്വഡോര്‍ പെറുവിനെ 1-0ത്തിനും പരാജയപ്പെടുത്തി. കരുത്തരായ ഉറുഗ്വെയെ വെനിസ്വേല ഗോള്‍ രഹിത സമനിലയില്‍ കുരുക്കി.