സാവോപോളോ: ലാറ്റിന്‍ അമേരിക്കന്‍ ലോകകപ്പ് യോഗ്യതാ മല്‍സരത്തില്‍ ബ്രസീല്‍ ഇക്വഡോറിനെ തോല്‍പ്പിച്ചു. 30-ാം മിനിറ്റില്‍ റോഡ്രിഗോ നേടിയ ഗോളാണ് ബ്രസീലിന് ജയമൊരുക്കിയത്. ജയത്തോടെ ബ്രസീല്‍ നാലാം സ്ഥാനത്തെത്തി. അടുത്ത മത്സരത്തില്‍ പരാഗ്വെയാണ് ബ്രസിലിന്റെ എതിരാളി. ജയിച്ചെങ്കിലും നിറംമങ്ങിയ പ്രകടനവുമായാണ് ബ്രസീല്‍ കളിച്ചത്. ഇക്വഡോറിനെതിരേ ചെറിയ ആധിപത്യം നേടാന്‍ മാത്രമാണ് കാനറികള്‍ക്ക് കഴിഞ്ഞത്. ഭാഗ്യം കൊണ്ടാണ് ബ്രസീല്‍ ഇന്ന് രക്ഷപ്പെട്ടത്. നേരത്തെ ബ്രസീല്‍ ആറാം സ്ഥാനത്തായിരുന്നു. തോല്‍വിയോടെ ഇക്വഡോര്‍ ആറിലേക്ക് വീണു.
ഒപ്പത്തിനൊപ്പം നില്‍ക്കാവുന്ന പ്രകടനമാണ് ഇക്വഡോര്‍ പുറത്തെടുത്ത്. മല്‍സരത്തില്‍ ബ്രസീലിന് നേരിയ മുന്‍തൂക്കം മാത്രമായിരുന്നു ഉണ്ടായിരുന്നത്. ബോള്‍ പാസ്സിങിലും ഷോട്ട് ഓണ്‍ ടാര്‍ഗറ്റിലും എല്ലാം നേരിയ വ്യത്യാസത്തിലാണ് ബ്രസീല്‍ മുന്നിലെത്തിയത്.എന്നാല്‍ ഫൗളുകളുടെ കാര്യത്തില്‍ ഇക്വഡോര്‍ ഏറെ മുന്നിലായിരുന്നു. സമനില ഗോളിനായി ഇക്വഡോര്‍ പൊരുതിയെങ്കിലും ബ്രസീല്‍ പ്രതിരോധം അത് തടഞ്ഞു.