ആന്‍ഫീല്‍ഡ്: യുവേഫാ ചാംപ്യന്‍സ് ലീഗില്‍ അട്ടിമറികളുടെ ദിനം. റയല്‍ മാഡ്രിനെ ഫ്രഞ്ച് ക്ലബ്ബ് ലില്ലെ അട്ടിമറിച്ചതിന് പിന്നാലെ അത്‌ലറ്റിക്കോ മാഡ്രിഡിനെ പോര്‍ച്ചുഗല്‍ വമ്പന്‍മാരായ ബെന്‍ഫിക്കയും മുട്ടുകുത്തിച്ചു. എതിരില്ലാത്ത നാല് ഗോളിനാണ് സ്പാനിഷ് പ്രമുഖര്‍ തോല്‍വി രുചിച്ചത്. ബെന്‍ഫിക്കയ്ക്കായി അര്‍ജന്റീനന്‍ സൂപ്പര്‍ താരം ഏയ്ഞ്ചല്‍ ഡി മരിയ, തുര്‍ക്കി വിങര്‍ മുഹമ്മദ് കെറെം അക്ടര്‍കോഗ്ലു, ഓര്‍ക്കുന്‍ കോക്കൂ, അല്കസാണ്ടര്‍ ഭാഹ എന്നിവര്‍ സ്‌കോര്‍ ചെയ്തു.
ചാംപ്യന്‍സ് ലീഗിലെ ആദ്യ മല്‍സരത്തില്‍ ബെന്‍ഫിക്ക സെര്‍ബിയന്‍ ക്ലബ്ബ് റെഡ് സ്റ്റാര്‍ ബെല്‍ഗ്രേഡിനെ 2-1ന് പരാജയപ്പെടുത്തിയിരുന്നു. അത്‌ലറ്റിക്കോ ആദ്യ മല്‍സരത്തില്‍ ആര്‍ബി ലെപ്‌സിഗിനെ ഇതേ സ്‌കോറിന് വീഴ്ത്തിയിരുന്നു. മറ്റൊരു മല്‍സരത്തില്‍ ഇംഗ്ലിഷ് ലീഗ് കരുത്തന്‍മാരായ ലിവര്‍പൂള്‍ എതിരില്ലാത്ത രണ്ട് ഗോളിന് ഇറ്റാലിയന്‍ ക്ലബ്ബ് ബോള്‍ഗാനയെ പരാജയപ്പെടുത്തി. മാക്ക് അലിസ്റ്റര്‍, മുഹമ്മദ് സലാഹ് എന്നിവരാണ് ചെമ്പടയ്ക്കായി ആന്‍ഫീല്‍ഡില്‍ സ്‌കോര്‍ ചെയ്തത്.