റിയാദ്: റയല്‍ മാഡ്രിഡിന്റെ സൂപ്പര്‍ താരങ്ങളായിരുന്ന സെര്‍ജിയോ റാമോസ്-ക്രിസ്റ്റിയാനോ റൊണാള്‍ഡോ സഖ്യം വീണ്ടും അല്‍ നസറില്‍ ഒന്നിച്ചേക്കും. നിലവില്‍ അല്‍ നസറിന് വേണ്ടി കളിക്കുന്ന റൊണാള്‍ഡോയ്‌ക്കൊപ്പം പുതിയ സീസണില്‍ സെര്‍ജിയോ റാമോസ് എത്തുമെന്നാണ് പുതിയ റിപ്പോര്‍ട്ട്. സ്പാനിഷ് ലീഗ് ക്ലബ്ബ് സെവിയ്ക്കായി കളിച്ചിരുന്ന താരം ഫ്രീ ഏജന്റാണ്.
എന്നാല്‍ അല്‍ നസര്‍ താരം ഐമറിക് ലപ്പോര്‍ട്ട ഈ സീസണില്‍ ക്ലബ്ബ് വിട്ടേക്കുമെന്ന് റിപ്പോര്‍ട്ടുണ്ട്. താരം സ്പാനിഷ് ക്ലബ്ബ് അത്‌ലറ്റിക്കോ ബില്‍ബാവോയിലേക്ക് ചേക്കേറിയേക്കും. ലപ്പോര്‍ട്ട പോവുന്ന സ്ഥാനത്താണ് റാമോസിനെ എത്തിക്കുക. ലോകത്തെ തന്നെ മികച്ച സെന്റര്‍ബാക്കായ റാമോസ് റയലിനായി 100 ഗോള്‍ സ്‌കോര്‍ ചെയ്തിരുന്നു. റൊണാള്‍ഡോയും റാമോസും ഒമ്പത് വര്‍ഷമാണ് റയലിനായി ഒരുമിച്ചിറങ്ങിയത്.
16 സീസണുകളില്‍ റയലിനായി കളിച്ച റാമോസ് 2021ലാണ് ക്ലബ്ബ് വിട്ടത്. പിന്നീട് രണ്ട് സീസണുകളില്‍ പിഎസ്ജിക്കൊപ്പമായിരുന്നു. കഴിഞ്ഞ വര്‍ഷമാണ് സെവിയ്യയിലേക്ക് മാറിയത്. താരത്തിനായി അല്‍ നസര്‍ രംഗത്തിറങ്ങിയെന്നാണ് ഏറ്റവും പുതിയ റിപ്പോര്‍ട്ട്. മറ്റൊരു പോര്‍ച്ചുഗല്‍ താരമായ റാഫേല്‍ ലിയോയെയും ടീമിലെത്തിക്കാനുള്ള ഒരുക്കത്തിലാണ് അല്‍ നസര്‍.