മാഡ്രിഡ്: കൊളംബിയന്‍ സ്റ്റാര്‍ സ്‌ട്രൈക്കര്‍ ജെയിംസ് റൊഡ്രിഗസ് സ്പാനിഷ് ലീഗിലേക്ക് തിരിച്ചെത്തുന്നു. 33കാരനായ കൊളംബിയന്‍ താരം റയോ വോല്‍ക്കാനോയ്‌ക്കൊപ്പമാണ് ഇക്കുറി വരുന്നത്. നാല് വര്‍ഷങ്ങള്‍ക്ക് ശേഷമാണ് റൊഡ്രിഗസ് സ്‌പെയിനില്‍ കളിക്കാനിറങ്ങുന്നത്.
ഒരു വര്‍ഷത്തെ കരാറിലാണ് റയോയ്‌ക്കൊപ്പം എത്തുക. കോപ്പാ അമേരിക്കയില്‍ മിന്നും പ്രകടനം നടത്തിയാണ് റൊഡ്രിഗസ് ഫുട്‌ബോളിലേക്കുള്ള തിരിച്ചുവരവ് നടത്തിയത്. ബ്രസീലിയന്‍ ക്ലബ്ബ് സാവോപോളയ്ക്ക് വേണ്ടിയാണ് താരം കളിച്ചിരുന്നത്. സാവോപോളയിലെ കരാര്‍ അടുത്തിടെ അവസാനിച്ചിരുന്നു. നിലവില്‍ താരം ഫ്രീ ഏജന്റാണ്.
കരിയറില്‍ മിന്നും ഫോമിലുള്ളപ്പോഴാണ് റൊഡ്രിഗസ് റയലില്‍ എത്തുന്നത്. എന്നാല്‍ കാര്യമായ അവസരം ലഭിക്കാതെ താരം ക്ലബ്ബ് വിടുകയായിരുന്നു. റയല്‍ വിട്ടതിന് ശേഷം പ്രീമിയര്‍ ലീഗിലെ എവര്‍ട്ടണിനൊപ്പവും ഖത്തറിലെ അല്‍ റയാനൊപ്പവും ഗ്രീസിലെ ഒളിംപിയാക്കോസ് ക്ലബ്ബിനൊപ്പവും താരം കളിച്ചിരുന്നു. ഇക്കഴിഞ്ഞ കോപ്പാ അമേരിക്കയില്‍ കൊളംബിയയെ ഫൈനലില്‍ എത്തിക്കുന്നതില്‍ ക്യാപ്റ്റന്‍ കൂടിയായ റൊഡ്രിഗസിന്റെ പ്രകടനം നിര്‍ണ്ണായകമായിരുന്നു.