മാഞ്ചസ്റ്റര്‍: മാഞ്ചസ്റ്റര്‍ യുണൈറ്റഡ് യുവതാരം അലെജാന്‍ഡ്രോ ഗര്‍നാചോയ്ക്ക് അര്‍ജന്റീനയുടെ ലോകകപ്പ് യോഗ്യതാ റൗണ്ടിലെ രണ്ട് മല്‍സരങ്ങള്‍ നഷ്ടപ്പെടും. ഈ മാസം നടക്കുന്ന രണ്ട് മല്‍സരങ്ങളാണ് ഗര്‍നാചോയ്ക്ക് നഷ്ടമാവുക. കാല്‍മുട്ടിലേറ്റ പരിക്കിനെ തുടര്‍ന്ന് താരം അര്‍ജന്റൈന്‍ ടീമിനൊപ്പം ചേരില്ലെന്നാണ് റിപ്പോര്‍ട്ട്. വെനസ്വേലയ്ക്കും ബൊളീവിയയ്ക്കുമെതിരായ ലോകകപ്പ് യോഗ്യത മത്സരങ്ങളാണ് ഗര്‍നാചോയ്ക്ക് നഷ്ടമാവുക.
ആസ്റ്റണ്‍ വില്ലയ്ക്കെതിരെ ഗോള്‍രഹിത സമനിലയില്‍ പിരിഞ്ഞ പ്രീമിയര്‍ ലീഗ് മത്സരത്തില്‍ മാഞ്ചസ്റ്റര്‍ യുണൈറ്റഡിന് വേണ്ടി ഗര്‍നാചോ ഇറങ്ങിയിരുന്നു. എന്നാല്‍ പിന്നീട് അസ്വസ്ഥത അനുഭവപ്പെട്ടതിനെ തുടര്‍ന്നാണ് ദേശീയ ടീമിനൊപ്പമുള്ള വരാനിരിക്കുന്ന യോഗ്യത മത്സരങ്ങള്‍ ഗര്‍നാചോയ്ക്ക് നഷ്ടമായത്.
മാഞ്ചസ്റ്റര്‍ യുണൈറ്റഡിന്റെ നിര്‍ണായക താരമാണ് 20 കാരനായ ഗര്‍നാചോ. ഈ സീസണില്‍ 11 മത്സരങ്ങള്‍ കളിച്ച യുണൈറ്റഡിന് വേണ്ടി നാല് ഗോളുകളും മൂന്ന് അസിസ്റ്റുകളും താരം നേടിയിട്ടുണ്ട്.