കറാച്ചി: പാകിസ്താന്‍ ക്രിക്കറ്റ് ടീമിന്റെ മുന്‍നിര താരങ്ങളായ ബാബര്‍ അസം, ഷഹീന്‍ അഫ്രീഡി, നസീം ഷാ എന്നിവരെ ഇംഗ്ലണ്ടിനെതിരായ ശേഷിക്കുന്ന ടെസ്റ്റുകളില്‍ നിന്ന് പുറത്താക്കി പാക് ക്രിക്കറ്റ് ബോര്‍ഡ്. ആദ്യത്തെ ടെസ്റ്റില്‍ പാക് ടീം ഏറ്റുവാങ്ങിയ വന്‍ തോല്‍വിക്ക് പിന്നാലെയാണ് നടപടി. വിക്കറ്റ് കീപ്പര്‍ സര്‍ഫറാസ് അഹമദ്, സ്പിന്നര്‍ അബ്രാര്‍ അഹ്‌മ്ദ് എന്നിവരെയും ടീമില്‍ നിന്നു പുറത്താക്കിയിട്ടുണ്ട്.
താരങ്ങള്‍ക്ക് ഒരു ഇടവേള ആവശ്യമാണെന്നും പുറത്താക്കിയ കളിക്കാര്‍ ഫിറ്റ്‌നെസും ഫോമും വീണ്ടെടുത്ത് ഉടന്‍ തിരിച്ചെത്തുമെന്നും പിസിബി അറിയിച്ചു.പുതിയ കമ്മിറ്റിയുടെ സ്‌ക്വാഡില്‍ ബാബറിന് സ്ഥാനമുണ്ടാവില്ലെന്ന് നേരത്തെ റിപ്പോര്‍ട്ടുണ്ടായിരുന്നു. ഇംഗ്ലണ്ടിനെതിരായ സ്‌ക്വാഡില്‍ മൂന്ന് പുതിയ താരങ്ങളെയും ഉള്‍പ്പെടുത്തിയിട്ടുണ്ട്.ഹസീബുല്ല, മെഹ്‌റാന്‍ മുംതാസ്, കംറാന്‍ ഗുലാം, ഫാസ്റ്റ് ബൗളര്‍ സാജിദ് ഖാന്‍, നോമന്‍ അലി, സാഹിദ് മെഹ്‌മൂദ് എന്നിവരെയാണ് ടീമില്‍ ഉള്‍പ്പെടുത്തിയിരിക്കുന്നത്.