ലഹോര്‍:ചാംപ്യന്‍സ് ട്രോഫിക്ക് നാളെ പാകിസ്ഥാനില്‍ തുടക്കം. ഏകദിന ഫോര്‍മാറ്റില്‍ നടക്കുന്ന മല്‍സരത്തിനായുള്ള ഒരുക്കങ്ങള്‍ എല്ലാം പൂര്‍ത്തിയായതായി പിസിബി അറിയിച്ചു. കറാച്ചിയില്‍ ബുധനാഴ്ച പാക്കിസ്ഥാനും ന്യൂസീലന്‍ഡും തമ്മിലാണ് ആദ്യമത്സരം. 30 വര്‍ഷത്തിനിടെ ആദ്യമായാണ് പാക്കിസ്ഥാന്‍ ഒരു മേജര്‍ ക്രിക്കറ്റ് ടൂര്‍ണമെന്റിന് ആതിഥ്യം വഹിക്കുന്നത്. കറാച്ചി, ലഹോര്‍, റാവല്‍പിണ്ടി എന്നിവയാണു പാക്കിസ്ഥാനിലെ മത്സരവേദികള്‍. ഇന്ത്യയുടെ മത്സരങ്ങള്‍ നിഷ്പക്ഷ വേദിയായ ദുബായില്‍ നടക്കും. ശ്രീലങ്കയ്‌ക്കെതിരായ ഏകദിന പരമ്പരയ്ക്കു ശേഷം ഓസ്‌ട്രേലിയന്‍ ടീം ഇന്നലെ പാക്കിസ്ഥാനിലെത്തി. 22ന് ഇംഗ്ലണ്ടിനെതിരെയാണ് ഓസ്‌ട്രേലിയയുടെ ആദ്യ മത്സരം.
എട്ടു വര്‍ഷത്തെ ഇടവേളയ്ക്ക് ശേഷമാണ് ചാംപ്യന്‍സ്‌ട്രോഫി അരങ്ങേറുന്നത്. എട്ടുടീമുകളാണ് മാറ്റുരയ്ക്കുന്നത്. 30 വര്‍ഷത്തോളം നീണ്ട കാത്തിരിപ്പിനൊടുവിലാണ് പാകിസ്ഥാന്‍ ഒരു ഐസിസി പോരിന് വേദിയാകുന്നത്. ലോകകപ്പ് കഴിഞ്ഞാല്‍ ഏകദിന ഫോര്‍മാറ്റിലെ രണ്ടാമത്തെ വലിയ പോരാണ് ചാംപ്യന്‍സ് ട്രോഫി. മാര്‍ച്ച് 9നാണ് ഫൈനല്‍ പോരാട്ടം.
ഇന്ത്യ 20നാണ് ആദ്യ മത്സരത്തിന് ഇറങ്ങുന്നത്. ബംഗ്ലാദേശാണ് എതിരാളികള്‍. 23നാണ് ഇന്ത്യ- പാകിസ്താന്‍ ബ്ലോക്ക്ബസ്റ്റര്‍ പോരാട്ടം. എല്ലാ മത്സരങ്ങളും ഉച്ചയ്ക്ക് ശേഷം 2.30 മുതലാണ് അരങ്ങേറുന്നത്. മത്സരങ്ങള്‍ ടെലിവിഷനിലൂടെ നെറ്റ്വര്‍ക്ക് 18, സ്റ്റാര്‍ സ്‌പോര്‍ട്‌സ് ചാനലുകളിലൂടെ കാണാം. ഓണ്‍ ലൈനായി ജിയോ ഹോട്ട് സ്റ്റാറിലും തത്സമയം കാണാം.
ഗ്രൂപ്പ് എ- ഇന്ത്യ, പകിസ്താന്‍, ബംഗ്ലാദേശ്, ന്യൂസിലന്‍ഡ്.
ഗ്രൂപ്പ് ബി- ദക്ഷിണാഫ്രിക്ക, ഓസ്‌ട്രേലിയ, അഫ്ഗാനിസ്ഥാന്‍, ഇംഗ്ലണ്ട്.