ജിദ്ദ – അല്‍ഇത്തിഹാദ് ഫുട്‌ബോള്‍ ക്ലബ്ബ് താരം അബ്ദുറസാഖ് ഹംദല്ലക്ക് ആരാധകന്റെ ചാട്ടവാറടി. അടിയേറ്റ് ഹംദല്ലയുടെ ശരീരത്തിന്റെ പുറം ഭാഗം ചുവന്ന് തുടുത്ത് അടയാളം വീണു. അബുദാബിയില്‍ മുഹമ്മദ് ബിന്‍ സായിദ് സ്റ്റേഡിയത്തില്‍ ദിര്‍ഇയ സൂപ്പര്‍ കപ്പ് ഫൈനലില്‍ അല്‍ഹിലാല്‍, അല്‍ഇത്തിഹാദ് ക്ലബ്ബുകള്‍ തമ്മില്‍ നടന്ന മത്സരത്തിനു ശേഷമായിരുന്നു സംഭവം.
കളി പൂര്‍ത്തിയായ ശേഷം ഗ്യാലറി ദിശയില്‍ നടന്നുനീങ്ങുന്നതിനിടെ ഹംദല്ല ആരാധകരില്‍ ഒരാള്‍ക്കു നേരെ തന്റെ കൈയിലുണ്ടായിരുന്ന മിനറല്‍ വാട്ടര്‍ കുപ്പിയില്‍ നിന്നുള്ള വെള്ളം തളിക്കുകയും ഉടന്‍ തന്നെ ആരാധകന്‍ തന്റെ കൈയിലുണ്ടായിരുന്ന ചാട്ടവാര്‍ ഉപയോഗിച്ച് ഹംദല്ലയെ പലതവണ ആഞ്ഞടിക്കുകയുമായിരുന്നു. സുരക്ഷാ സൈനികര്‍ ഇടപെട്ടാണ് ഹംദല്ലയെ അക്രമിയില്‍ നിന്ന് അകറ്റിനിര്‍ത്തിയത്. അക്രമിയെ പിന്നീട് സുരക്ഷാ വകുപ്പുകള്‍ അറസ്റ്റ് ചെയ്തു.
കളി പൂര്‍ത്തിയായ ശേഷം സ്റ്റേഡിയത്തില്‍ നിന്ന് പുറത്തുപോകുന്നതിനിടെ ആരാധകരില്‍ ഒരാള്‍ പ്രകോപനപരമായ എന്തോ വിളിച്ചുപറഞ്ഞതോടെയാണ് ഹംദല്ല അയാള്‍ക്കു നേരെ തന്റെ കൈയിലുണ്ടായിരുന്ന കുപ്പിയിലെ വെള്ളം തളിച്ചത് എന്നാണ് വിവരം. അല്‍ഹിലാല്‍ ക്ലബ്ബുമായുള്ള വാശിയേറിയ മത്സരത്തില്‍ ഒന്നിനെതിരെ നാലു ഗോളുകള്‍ക്ക് അല്‍ഇത്തിഹാദ് ദയനീയമായി പരാജയപ്പെട്ടിരുന്നു. ഇത്തിഹാദിനു വേണ്ടി ഹംദല്ലയാണ് ആശ്വാസ ഗോള്‍ നേടിയത്. സ്വകാര്യ അവകാശ കേസില്‍ അക്രമിക്ക് പിന്നീട് ഹംദല്ല പോലീസിനു മുന്നില്‍ വെച്ച് മാപ്പ് നല്‍കി.