മയാമി– 2026 ഫിഫ ലോകകപ്പിന്റെ ആവേശകരമായ ഗ്രൂപ്പ് ഘട്ട പോരാട്ടങ്ങൾ അവസാന റൗണ്ടിലേക്ക് കടക്കുകയാണ്. ഗ്രൂപ്പ് J, K, L എന്നിവയിലെ നിർണായക മത്സരങ്ങളാണ് ഇന്ന് നടക്കുന്നത്. റൗണ്ട് ഓഫ് 32 നോക്കൗട്ട് സ്റ്റേജിലേക്ക് ഇതിനകം തന്നെ പല പ്രമുഖരും യോഗ്യത നേടിയെങ്കിലും ഗ്രൂപ്പ് ചാമ്പ്യന്മാരെ നിശ്ചയിക്കാനുള്ള കടുത്ത പോരാട്ടങ്ങളാണ് ഇന്ന് നടക്കാനിരിക്കുന്നത്. ഇന്ത്യൻ ഫുട്ബോൾ ആരാധകർക്കായി ഇന്നത്തെ പ്രധാന മത്സരങ്ങളുടെ വിശദാംശങ്ങളും കൃത്യമായ ഇന്ത്യൻ സമയക്രമവും താഴെ നൽകുന്നു.
മെസ്സി വേട്ട തുടരുമോ? നോക്കൗട്ട് ഉറപ്പിച്ച അർജന്റീന ജോർദാനെതിരെ, രണ്ടാം സ്ഥാനത്തിനായി അൾജീരിയ-ഓസ്ട്രിയ പോരാട്ടം
ഈ ലോകകപ്പിൽ ഗ്രൂപ്പ് J-ൽ നിന്ന് ഇതിനകം തന്നെ അർജന്റീന റൗണ്ട് ഓഫ് 32 നോക്കൗട്ട് ഘട്ടത്തിലേക്ക് യോഗ്യത ഉറപ്പിച്ചു കഴിഞ്ഞു. ആദ്യ മത്സരത്തിൽ അൾജീരിയയെ എതിരില്ലാത്ത 3 ഗോളുകൾക്ക് തകർത്ത അർജന്റീന, രണ്ടാം മത്സരത്തിൽ ഓസ്ട്രിയയെ 2-0 ത്തിനും പരാജയപ്പെടുത്തിയിരുന്നു. ഈ ലോകകപ്പിൽ അർജന്റീന ആകെ അടിച്ചുകൂട്ടിയ 5 ഗോളുകളും സ്വന്തമാക്കിയത് ക്യാപ്റ്റൻ ലയണൽ മെസ്സിയാണ്. ഇതിൽ അൾജീരിയക്കെതിരെയുള്ള മത്സരത്തിലെ ഉജ്ജ്വലമായ ഹാട്രിക്കും ഉൾപ്പെടുന്നു. നിലവിൽ മികച്ച ഫോമിലുള്ള മെസ്സി ടൂർണമെന്റിലെ ടോപ്പ് സ്കോറർക്കുള്ള ഗോൾഡൻ ബൂട്ട് റേസിൽ മുന്നിലാണ്. ഇതിനകം തന്നെ നോക്കൗട്ട് ഉറപ്പിച്ചതിനാൽ ഇന്നത്തെ ജോർദാനെതിരെയുള്ള മത്സരത്തിൽ പരിശീലകൻ ലയണൽ സ്കലോണി മെസ്സിക്ക് വിശ്രമം അനുവദിക്കുമോ അതോ ഗോൾ വേട്ട തുടരാൻ താരത്തെ കളത്തിലിറക്കുമോ എന്നാണ് ആരാധകർ ഉറ്റുനോക്കുന്നത്. അർജന്റീനയും ജോർദാനും തമ്മിലുള്ള ഈ മത്സരം ഇന്ത്യൻ സമയമനുസരിച്ച് ജൂൺ 28 ഞായറാഴ്ച പുലർച്ചെ 7:30 നാണ് നടക്കുന്നത്. ഇതേ സമയത്ത് തന്നെ നടക്കുന്ന മറ്റൊരു മത്സരത്തിൽ ഗ്രൂപ്പ് J-യിലെ രണ്ടാം സ്ഥാനക്കാരെ നിശ്ചയിക്കാൻ അൾജീരിയ ഓസ്ട്രിയയെ നേരിടും.
ഗ്രൂപ്പ് ചാമ്പ്യന്മാരെ നിശ്ചയിക്കാൻ പോർച്ചുഗൽ-കൊളംബിയ തീപാറും പോരാട്ടം
മറ്റൊരു ആവേശപ്പോരാട്ടത്തിൽ ഗ്രൂപ്പ് K-ൽ ഗ്രൂപ്പ് ചാമ്പ്യന്മാരെ തീരുമാനിക്കുന്ന നിർണായക മത്സരത്തിൽ കൊളംബിയ പോർച്ചുഗലിനെ നേരിടും. ആദ്യ മത്സരത്തിൽ ഡിആർ കോംഗോയോട് 1-1 ന് സമനില വഴങ്ങിയെങ്കിലും, രണ്ടാം മത്സരത്തിൽ ഉസ്ബെക്കിസ്ഥാനെ 5-0 ത്തിന് തകർത്തുവിട്ടാണ് പോർച്ചുഗൽ വരുന്നത്. സൂപ്പർ താരം ക്രിസ്റ്റ്യാനോ റൊണാൾഡോ കഴിഞ്ഞ മത്സരത്തിൽ ഇരട്ട ഗോളുകൾ നേടി മികച്ച ഫോമിലാണ്. പോർച്ചുഗലിന് ഗ്രൂപ്പ് ചാമ്പ്യന്മാരായി നോക്കൗട്ടിലേക്ക് കടക്കാൻ ഇന്നത്തെ മത്സരത്തിൽ കൊളംബിയക്കെതിരെ ജയം അനിവാര്യമാണ്. സമനില വഴങ്ങിയാൽ തന്നെ കൊളംബിയ ഗ്രൂപ്പ് ജേതാക്കളാകും. പരിക്കിൽ നിന്ന് മോചിതനായി പ്രതിരോധ നിരയിൽ റൂബൻ ഡയസ് തിരിച്ചെത്തുന്നത് പോർച്ചുഗലിന് കരുത്താകും. അക്രമണ ശൈലിയിലുള്ള 4-2-3-1 ഫോർമേഷനിൽ റൊണാൾഡോക്കൊപ്പം ബ്രൂണോ ഫെർണാണ്ടസും ജാവോ ഫെലിക്സും അണിനിരക്കുമെന്നാണ് പ്രതീക്ഷിക്കുന്നത്. ഫുട്ബോൾ ലോകം കാത്തിരിക്കുന്ന ഈ പോർച്ചുഗൽ – കൊളംബിയ പോരാട്ടം ഇന്ത്യൻ സമയമനുസരിച്ച് ജൂൺ 28 ഞായറാഴ്ച പുലർച്ചെ 5:00 മണിക്കാണ് ആരംഭിക്കുന്നത്. ഇതേ സമയത്ത് തന്നെ ഗ്രൂപ്പിലെ ജീവനമരണ പോരാട്ടത്തിൽ ഡിആർ കോംഗോ ഉസ്ബെക്കിസ്ഥാനെയും നേരിടും.
ഗ്രൂപ്പ് ചാമ്പ്യൻപട്ടം ലക്ഷ്യമിട്ട് ഇംഗ്ലണ്ട് പനാമക്കെതിരെ; ക്രോയേഷ്യക്ക് ഘാന വെല്ലുവിളി
ഗ്രൂപ്പ് L-ൽ ഒന്നാം സ്ഥാനം ഉറപ്പിക്കാൻ ഹാരി കേനിന്റെ ഇംഗ്ലണ്ട് പനാമയെ നേരിടാൻ ഒരുങ്ങുകയാണ്. കഴിഞ്ഞ മത്സരത്തിൽ ഘാനയോട് ഗോൾരഹിത സമനില വഴങ്ങിയ ഇംഗ്ലണ്ടിന് ഗ്രൂപ്പ് ചാമ്പ്യന്മാരാകാൻ വലിയ മാർജിനിലുള്ള വിജയം ആവശ്യമാണ്. ഇതേ ഗ്രൂപ്പിലെ മറ്റൊരു ശക്തരായ ക്രോയേഷ്യ ഘാനയെ നേരിടും. ഇംഗ്ലണ്ട് പനാമയോട് പോയിന്റ് നഷ്ടപ്പെടുത്തിയാൽ ക്രോയേഷ്യ-ഘാന മത്സരത്തിലെ വിജയികൾക്ക് ഗ്രൂപ്പ് ചാമ്പ്യന്മാരാകാൻ അവസരമൊരുങ്ങും. ലൂക്കാ മോഡ്രിച്ചിന്റെ ക്രോയേഷ്യക്ക് നോക്കൗട്ട് ഉറപ്പാക്കാൻ ഘാനക്കെതിരെ ജയം അനിവാര്യമാണ്. ഗ്രൂപ്പ് L-ലെ ഈ രണ്ട് മത്സരങ്ങളും ഇന്ത്യൻ സമയമനുസരിച്ച് ജൂൺ 28 ഞായറാഴ്ച പുലർച്ചെ 2:30 നാണ് ഒരേസമയം നടക്കുന്നത്.