കൊച്ചി: ഭാവി വധുവിനെ പരിചയപ്പെടുത്തി ഉപ്പും മുളകും ഷോയിലെ മുടിയൻ എന്ന കഥാപാത്രത്തിലൂടെ പ്രേക്ഷകരുടെ ശ്രദ്ധ പിടിച്ചുപറ്റിയ താരം ഋഷി കുമാർ രംഗത്ത്. നടിയും മോഡലുമായ ഡോ. ഐശ്വര്യ ഉണ്ണിയാണ് ജീവിത പങ്കാളിയെന്ന് താരം അറിയിച്ചു.
ഉപ്പും മുളകും പ്രേക്ഷകരിൽ കൂടുതൽ പേരും മുടിയൻ എന്ന് വിളിക്കുന്ന ഋഷി കുമാർ യു ട്യൂബ് വീഡിയോയിലൂടെയാണ് തന്റെ ഭാവി വധുവിനെ പരിചയപ്പെടുത്തിയത്. ആറു വർഷമായി പ്രണയത്തിലായിരുന്നുവെന്നും ഇപ്പോൾ ഒഫീഷ്യൽ ആക്കേണ്ട സമയമായതിനാലാണ് പ്രപ്പോസ് ചെയ്യുന്നതെന്നുമാണ് വീഡിയോയിലുള്ളത്.
പ്രപ്പോസൽ മോതിരം വാങ്ങുന്നത് അടക്കമുള്ള കാര്യങ്ങൾ ഋഷി വീഡിയോയിൽ ഉൾപ്പെടുത്തിയിട്ടുണ്ട്. അമ്മയോട് സമ്മതം വാങ്ങിയതിനുശേഷം അനുജന്റെ സഹായത്തോടെയാണ് ഐശ്വര്യയെ പ്രപ്പോസ് ചെയ്യുന്നതിനുള്ള ക്രമീകരണങ്ങൾ ചെയ്തതെന്നും പറയുന്നു.
ഇന്ദ്രിയ സാൻഡ്സ് റിസോർട്ടിൽ വച്ച് മോതിരം അണിയിച്ചാണ് ഐശ്വര്യയെ ഋഷി ജീവിതത്തിലേക്ക് കൂട്ടിയത്. ഈ നിമിഷത്തിനായി താൻ കാത്തിരിക്കുകയായിരുന്നുവെന്ന് ഐശ്വര്യ പ്രതികരിച്ചു. പൂഴിക്കടകൻ, അലമാര, സകലകലാശാല തുടങ്ങിയ ചിത്രങ്ങളിൽ മോഡൽ കൂടിയായ ഡോ. ഐശ്വര്യ അഭിനയിച്ചിട്ടുണ്ട്.