- മുൻകൂർ ജാമ്യത്തിനായി കുറ്റാരോപിതർ
തിരുവനന്തപുരം: ലൈംഗികാതിക്രമ പരാതിയിൽ നടൻ സിദ്ദിഖിനെതിരെ കേസെടുത്തതിന് പിന്നാലെ നിർണായക തെളിവുകൾ ശേഖരിച്ച് പ്രത്യേക അന്വേഷണം സംഘം. സിദ്ദിഖും പരാതിക്കാരിയായ യുവനടിയും തിരുവനന്തപുരത്തെ ഹോട്ടലിൽ ഉണ്ടായിരുന്നതിന്റെ വിവരങ്ങൾ അന്വേഷണ സംഘത്തിന് ലഭിച്ചതായാണ് വിവരം.
മസ്‌കറ്റ് ഹോട്ടലിലെ രജിസ്റ്ററിൽ ഇരുവരുടേയും പേരുകളുണ്ട്. റിസപ്ഷനിലെ രജിസ്റ്ററിൽ പേരെഴുതി ഒപ്പുവെച്ചാണ് നടി മുറിയിലെത്തിയത്. സിദ്ദിഖ് ഒന്നാം നിലയിലെ മുറിയിലാണുണ്ടായിരുന്നത്. ഇരുവരും ഒരേസമയത്ത് ഹോട്ടലിൽ ഉണ്ടായിരുന്നുവെന്നും പ്രിവ്യൂ ഷോയ്ക്ക് ശേഷമാണ് ഇരുവരും ഹോട്ടലിലെത്തിയതെന്നും പ്രിവ്യൂവിന് ഇരുവരും ഉണ്ടായിരുന്നതായും അന്വേഷണ സംഘം സ്ഥിരീകരിച്ചിട്ടുണ്ട്.
സിനിമാ ചർച്ചയ്ക്ക് വേണ്ടിയെന്ന് പറഞ്ഞാണ് നടൻ സിദ്ദിഖ് ഒന്നാം നിലയിലെ മുറിയിലേക്ക് വിളിച്ചതെന്നും ഇവിടെ വച്ചാണ് തന്നെ ക്രൂരമായി പീഡിപ്പിച്ചതെന്നും നടി മൊഴി നൽകിയിരുന്നു. തിരുവനന്തപുരം നിള തിയേറ്ററിലെ പ്രിവ്യൂ ഷോയ്ക്ക് ശേഷമായിരുന്നു സംഭവമെന്നും ഇക്കാര്യം മാതാപിതാക്കളോട് പറഞ്ഞിരുന്നെന്നും നടി നേരത്തെ വെളിപ്പെടുത്തിയിരുന്നു. ഈ തെളിവ് ശേഖരണത്തിന് പിന്നാലെ, ഇനി നടിയുടെ മാതാപിതാക്കളുടെ മൊഴി രേഖപ്പെടുത്താനാണ് അന്വേഷണ സംഘത്തിന്റെ തീരുമാനം.
തെളിവുകൾ നടൻ സിദ്ദിഖിന് കൂടുതൽ കുരുക്കാകുമെന്ന കണക്കുകൂട്ടലിലാണ് ഇരയെ പിന്തുണയ്ക്കുന്നവർ. വിവിധ നടിമാരുടെ ലൈംഗിക ആരോപണങ്ങളെ തുടർന്ന് പോലീസ് കേസെടുത്തതിന് പിന്നാലെ നടൻ സിദ്ദിഖും സംവിധായകൻ രഞ്ജിത്തും ഉൾപ്പെടെയുള്ള കുറ്റാരോപിതർ മുൻകൂർ ജാമ്യത്തിനുള്ള തീവ്ര ശ്രമത്തിലാണ്.