പാലക്കാട് അച്ഛനും മകനും ഷോക്കേറ്റ് മരിച്ചു

പാലക്കാട്: വാളയാർ അട്ടപ്പള്ളത്ത് ഷോക്കേറ്റ് അച്ഛനും മകനും മരിച്ചു. അട്ടപ്പള്ളം സ്വദേശി മോഹനൻ(60), മകൻ അനിരുദ്ധ്(20) എന്നിവരാണ് മരിച്ചത്. കൃഷിയിടത്തിൽ സ്ഥാപിച്ച പന്നിക്കെണിയിൽനിന്ന് ഷോക്കേറ്റതാണെന്നാണ് പ്രാഥമിക നിഗമനം.

ബുധനാഴ്ച വൈകുന്നേരം 6.30-ഓടെയാണ് സംഭവം. തോട്ടിൽനിന്ന് പാടത്തേക്ക് വെള്ളം ഒഴുക്കുന്നതിനായാണ് ഇരുവരും എത്തിയത്. അച്ഛന് ഷോക്കേറ്റപ്പോൾ രക്ഷിക്കാനുള്ള ശ്രമത്തിനിടെയാണ് മകനും മരിച്ചതെന്നാണ് വിവരം.

വാളയാർ പോലീസ് സ്ഥലത്തെത്തി മേൽനടപടികൾ സ്വീകരിച്ചു. ഇരുവരുടേയും മൃതദേഹങ്ങൾ പാലക്കാട് ജില്ലാ ആശുപത്രിയിലേക്ക് മാറ്റി. മൃതദേഹം നാളെ പോസ്റ്റുമോർട്ടത്തിന് ശേഷം കുടുംബത്തിന് വിട്ടുനൽകുമെന്ന് പോലീസ് പറഞ്ഞു.