നിലമ്പൂർ: സി.പി.എം സംസ്ഥാന സെക്രട്ടറി എം.വി ഗോവിന്ദൻ മാസ്റ്റർക്കു നൽകിയ പരാതിയിൽ മുഖ്യമന്ത്രി പിണറായി വിജയന്റെ പൊളിട്ടിക്കൽ സെക്രട്ടറി പി ശശിയുടെ പേര് പറഞ്ഞിട്ടില്ലെന്ന് നിലമ്പൂർ എം.എൽ.എ പി.വി അൻവർ. അൻവർ തന്ന പരാതിയിൽ പി ശശിയെക്കുറിച്ച് ഒന്നുമില്ലെന്ന പാർട്ടി സെക്രട്ടറിയുടെ പ്രസ്താവന ശരിയാണെന്നും വൈകാതെ മുഖ്യമന്ത്രിക്കും പാർട്ടി സെക്രട്ടറിക്കും ഇതുസംബന്ധിച്ച പരാതി നൽകുമെന്നും അദ്ദേഹം നിലമ്പൂരിൽ മാധ്യമങ്ങളോട് പ്രതികരിച്ചു.
മുഖ്യമന്ത്രിക്ക് പരാതി നൽകിയാൽ അദ്ദേഹമത് പൊളിറ്റിക്കൽ സെക്രട്ടറിക്ക് കൈമാറുമെന്നും പിന്നീട് ആ പരാതിയിൽ ഒരു ചുക്കും നടക്കില്ലെന്നും അൻവർ ആരോപിച്ചു. പാർട്ടി പ്രവർത്തകർക്ക് ഇത്തരത്തിൽ ഒരുപാട് അനുഭവമുണ്ട്. അതിനാലാണ് ഒരു പൊതുപ്രവർത്തകൻ എന്ന നിലയിൽ ഞാൻ കാര്യങ്ങൾ പരസ്യമായി പറഞ്ഞത്. ഇത് പാർട്ടി സംവിധാനത്തിന് എതിരാണെന്നറിയാം. അതിനാൽ പാർട്ടി പ്രവർത്തകർ എന്നോട് ക്ഷമിക്കണമെന്നും അദ്ദേഹം പറഞ്ഞു. സി.പി.എം പാർലമെന്റിറി യോഗം ഇനി അടുത്ത നിയമസഭ യോഗത്തിനു മുമ്പ് മാത്രമേ നടക്കൂ. അതുവരെ കാത്തിരിക്കാനാവില്ല എന്നതിനാലാണ് താൻ പരസ്യമായി ഇക്കാര്യങ്ങൾ പറഞ്ഞതും ഇരുവർക്കും പരാതി നൽകിയതും. ഈ പോക്ക് പോയാൽ ഇനി താൻ ഉന്നയിച്ച പരാതികളിൽ വനിതാ പോലീസ് അന്വേഷണ സംഘം തന്നെ വേണ്ടിവരുമെന്നും അൻവർ ചൂണ്ടിക്കാട്ടി.
പോലീസിനെതിരെ പരാതി അറിയിക്കാനുള്ളവർക്ക് അക്കാര്യം തന്നെ 8304855901 എന്ന വാട്‌സ്ആപ്പ് നമ്പറിൽ അറിയിക്കാം. താൻ നൽകിയ പരാതികൾ അന്വേഷിക്കാൻ പോലീസിലെ നല്ല ആൺകുട്ടികൾ തന്നെ വരണം. തന്റെ പക്കലുള്ള എല്ലാ തെളിവും അന്വേഷണ സംഘത്തിന് നൽകും. ശനിയാഴ്ച ഡി.ഐ.ജി തന്നോട് തെളിവുകളുമായി മൊഴിയെടുക്കാൻ ഹാജരാകാൻ ആവശ്യപ്പെട്ടിട്ടുണ്ട്. താൻ മൊഴി നൽകുമെന്നും ഒരു സ്വാധീനവും ഈ അന്വേഷണത്തിൽ നടക്കില്ലെന്നും എം.എൽ.എ വ്യക്തമാക്കി.