കോഴിക്കോട്: ലോകസഭാ തെരഞ്ഞെടുപ്പിൽ വടകരയിൽ ഇടത് സ്ഥാനാർത്ഥിയായി മത്സരിച്ച സി.പി.എം കേന്ദ്ര കമ്മിറ്റി അംഗം കെ.കെ ശൈലജക്കെതിരെ ഫെയ്സ്ബുക്കിൽ അശ്ലീല പരാമർശം നടത്തിയ കേസിൽ യൂത്ത് കോൺഗ്രസ് പ്രവർത്തകന് ശിക്ഷ. തൊട്ടിൽ പാലം ചാപ്പന്തോട്ടം സ്വദേശി മെബിൻ തോമസിനെയാണ് കോടതി ശിക്ഷിച്ചത്. കോടതിപിരിയും വരെ തടവും 10,000 രൂപ പിഴയുമാണ് ശിക്ഷ. പ്രതി നാദാപുരം ജുഡിഷ്യൽ ഫസ്റ്റ് ക്ലാസ് മജിസ്ട്രറ്റ് കോടതിയിൽ കുറ്റം സമ്മതിച്ചിരുന്നു.
തെരഞ്ഞെടുപ്പ് സമയത്ത് എല്ലാ സീമകളും ലംഘിച്ചുള്ള വ്യാജപ്രചാരണമാണ് യു ഡി എഫ് നേതാക്കളും അണികളും അവരുടെ സോഷ്യൽ മീഡിയാ അക്കൗണ്ടുകൾ വഴി നടത്തിയതെന്നും പലനാൾ കള്ളൻ ഒരുനാൾ പിടിയിലെന്നാണല്ലോ എന്നും അവർ ഫെയ്സ്ബുക്കിൽ കുറിച്ചു.
കെ.കെ ശൈലജയുടെ ഫെയ്സ്ബുക്ക് പോസ്റ്റ് ഇങ്ങനെ:
വടകര തെരഞ്ഞെടുപ്പുമായി ബന്ധപ്പെട്ട് മാന്യതയുടെ എല്ലാ സീമകളും ലംഘിച്ചുള്ള വ്യാജപ്രചാരണമാണ് യുഡിഎഫ് നേതാക്കളും അണികളും അവരുടെ സോഷ്യൽ മീഡിയാ അക്കൗണ്ടുകൾ വഴി നടത്തിയത്.
തെരഞ്ഞെടുപ്പിന് ശേഷവും നീചമായ ആക്രമണമാണ് തനിക്കെതിരെ യു ഡി എഫ് സൈബർ വിംഗ് നടത്തിയത്. ഇതുമായി ബന്ധപ്പെട്ട് അന്ന് തന്നെ പരാതി നല്കിയിരുന്നു.
പരാതിയുടെ അടിസ്ഥാനത്തിൽ പൊലീസ് നടത്തിയ അന്വേഷണത്തിൽ യൂത്ത് കോൺഗ്രസ് നേതാവ് തൊട്ടിൽപ്പാലം സ്വദേശി മെബിൻ തോമസിനെ കോടതി ശിക്ഷിച്ചിരിക്കുന്നു. പാലക്കാട് ഉപതെരഞ്ഞെടുപ്പിലെ കോൺഗ്രസ് സ്ഥാനാർത്ഥിയുടെ നേതൃത്വത്തിലായിരുന്നു വടകര പാർലമെന്റ് തെരഞ്ഞെടുപ്പിൽ പ്രചാരണം നടന്നിരുന്നത്.
പാലക്കാട് ഉപതെരഞ്ഞെടുപ്പുമായി ബന്ധപ്പെട്ട് കള്ളപ്പണം കടത്തിയതുമായി ബന്ധപ്പെട്ട സംശയാസ്പദമായ വിവരങ്ങൾ പുറത്തുവരുന്ന ഘട്ടത്തിൽ ശിക്ഷവിധിച്ചുകൊണ്ട് വന്ന ഈ വിധി നിർണായകമാണ്. പലനാൾ കള്ളൻ ഒരുനാൾ പിടിയിലെന്നാണല്ലോ. ഈ വ്യാജന്മാരെ പാലക്കാട്ടെ ജനത തിരിച്ചറിഞ്ഞ് മറുപടി നല്കും.