വടകര: വയനാട്ടിലേക്കുള്ള വിനോദ യാത്രയ്ക്കിടെ താമരശേരി ചുരത്തിലെ കൊക്കയിൽവീണ് യുവാവ് മരിച്ചു. വടകര തോടന്നൂർ സ്വദേശിയായ തോടന്നൂർ വരക്കൽ രവീന്ദ്രൻ്റെ മകൻ അമൽ(23) ആണ് മരിച്ചത്. താമരശേരി ചുരത്തിൽ ഒമ്പതാം വളവിനടുത്താണ് അപകടം. ഇന്ന് പുലര്‍ച്ചെ ഒന്നരയോടെയാണ് അപകടമുണ്ടായത്. മൂത്രമൊഴിക്കാനായി ഇറങ്ങിയപ്പോൾ കാല് തെന്നി അബദ്ധത്തില്‍ കൊക്കയിലേക്ക് വീണെ
ന്നാണ് വിവരം.
കോഴിക്കോട്ടെ സ്വകാര്യ സ്ഥാപനത്തിൽ ഡ്രൈവറായി ജോലി നോക്കുന്ന അമൽ സഹപ്രവർത്തകർക്കൊപ്പം വയനാട്ടിലേക്ക് വിനോദയാത്ര പോകുകയായിരുന്നു.
അമൽ അടക്കം 13 പേരാണ് വാഹനത്തിൽ ഉണ്ടായിരുന്നത്. യാത്രയ്ക്കിടെ ഒമ്പതാം വളവിന് സമീപത്തെത്തിയപ്പോൾ മൂത്രമൊഴിക്കാനായി ട്രാവലർ നിർത്തുകയും പുറത്തിറങ്ങിയ അമൽ അബദ്ധത്തിൽ കൊക്കയിലേക്ക് വീഴുകയുമായിരുന്നു. പിന്നാലെ ഒപ്പമുണ്ടായിരുന്ന സുഹൃത്തുക്കൾ രക്ഷപെടുത്താൻ ശ്രമിച്ചെങ്കിലും ശ്രമങ്ങൾ വിഫലമാകുകയായിരുന്നു. ഫയർ ഫോഴ്സ് എത്തി കരക്കെത്തിച്ച് ആശുപത്രിയിലെത്തിച്ചെങ്കിലും മരിച്ചിരുന്നു.