പാലക്കാട്: പാലക്കാട് ഉപതെരഞ്ഞെടുപ്പ് ഫലത്തിൽ ഇടതു മുന്നണി സ്ഥാനാർത്ഥി ഡോ. പി സരിനെ ട്രോളി കോൺഗ്രസ് നേതാവ് ഡോ. എസ്.എസ് ലാൽ രംഗത്ത്. വോട്ടെണ്ണലിൽ ബഹുദൂരം പിന്നിലായ ഡോ. സരിനോട് ഇനി സ്റ്റെതസ്കോപ്പെടുത്ത് ജോലി ചെയ്തു ജീവിക്കാമെന്നാണ് പ്രൊഫഷണൽ കോൺഗ്രസ് നേതാവ് കൂടിയായ ഡോ. ലാൽ ഓർമിപ്പിച്ചത്.
രാഷ്ട്രീയം ഒഴിച്ചുള്ള കാര്യങ്ങളിൽ പഴയതുപോലെ എന്നെ ഇനിയും വിശ്വസിക്കാം. ലാലേട്ടാ എന്ന ആ പഴയ വിളിക്കായി ഞാൻ വീണ്ടും കാത്തിരിക്കുന്നു. നമ്മുടെ പാർട്ടി ഓഫീസിൽ ഇനി അനിയനെ കയറ്റൂല. എന്നാൽ, പാർട്ടി മാറുന്ന തിരക്കിൽ അവിടെ നിന്ന് എടുക്കാൻ മറന്നുപോയ ഖദർ ഉടുപ്പും മുണ്ടുമൊക്കെ അവിടെത്തന്നെയുണ്ടെന്നറിഞ്ഞു. ആവശ്യമുണ്ടെങ്കിൽ അതൊക്കെ തിരിച്ചു വാങ്ങിത്തരാമെന്നും ഡോ. ലാൽ ഫേസ്ബുക്കിൽ കുറിച്ചു.
കോൺഗ്രസ് വിട്ട് ഇടതിനൊപ്പം ചേർന്ന ഡോ. സരിനെ 18,689 വോട്ടുകൾക്കാണ് കന്നിയങ്കത്തിൽതന്നെ രാഹുൽ മാങ്കൂട്ടത്തിൽ തോൽപ്പിച്ച് മണ്ഡലം നിലനിർത്തി റെക്കോർഡ് ഭൂരിപക്ഷം നേടിയത്.