പേ വിഷബാധയേറ്റ് വനിതാ ഡോക്ടർക്ക് ദാരുണാന്ത്യം; സമ്പർക്കപ്പട്ടികയിലുള്ളവർ കുത്തിവെയ്‌പ്പെടുക്കണം

പാലക്കാട്: പേവിഷ ബാധയേറ്റ് പാലക്കാട് ഹോമിയോ ഡോക്ടർക്ക് ദാരുണാന്ത്യം. പാലക്കാട് ജില്ലയിലെ മണ്ണാർക്കാട് കുമരംപുത്തൂർ പള്ളിക്കുന്ന് ചേരിങ്ങൽ ഉസ്മാന്റെ ഭാര്യ ഡോ. റംല(42)ത്താണ് മരിച്ചത്.
വീട്ടിലെ വളർത്തു നായയുടെ നഖം തട്ടി രണ്ടുമാസം മുമ്പ് റംലത്തിന് മുറിവേറ്റിരുന്നു. വളർത്തുനായ ആയതിനാൽ റംലത്ത് ചികിത്സ തേടിയിരുന്നില്ല. പിന്നീട് ദിവസങ്ങൾക്കുശേഷം നായ ചത്തു.
ഞായറാഴ്ചയാണ് റംലത്തിന് അസ്വസ്ഥതയുണ്ടായത്. തുടർന്ന് ഇവരെ തൃശൂർ മെഡിക്കൽ കോളജിൽ പ്രവേശിപ്പിക്കുകയായിരുന്നു. നിരീക്ഷണത്തിലിരിക്കെ, റംലത്തും ഭർത്താവ് ഉസ്മാനും തിങ്കളാഴ്ച പുലർച്ചെ മെഡിക്കൽ കോളജ് അധികൃതരുടെ അനുമതിയില്ലാതെ വീട്ടിലേക്ക് മടങ്ങുകയായിരുന്നു. എന്നാൽ, രാവിലെ ഒൻപത് മണിയോടെ വീട്ടിലെത്തിയ റംലത്തിന് വീണ്ടും അസ്വസ്ഥത അനുഭവപ്പെട്ടു. പിന്നീട് ഉച്ചയോടെ മരിക്കുകയായിരുന്നു.
മരണ വിവരം അറിഞ്ഞ് ആരോഗ്യ വകുപ്പ് അധികൃതർ സ്ഥലത്തെത്തി. ഇവരുമായി ഇടപഴകിയ എല്ലാവരോടും കുത്തിവയ്‌പ്പെടുക്കാൻ നിർദ്ദേശിച്ചതായി ആരോഗ്യ വകുപ്പ് അധികൃതർ വ്യക്തമാക്കി.