ആലുവ– കൊച്ചിയില്‍ നിന്ന് ന്യൂഡല്‍ഹിയിലേക്കുളള എയര്‍ ഇന്ത്യയുടെ വിമാനം തെന്നിമാറിയെന്ന സംശയമുന്നയിച്ച് യാത്രക്കരാനായ ഹൈബി ഈഡന്‍ എംപി രംഗത്തെത്തിയതിന് പിന്നാലെ എഞ്ചിന്‍ തകരാറെന്ന് സ്ഥിരീകരിച്ച് അധികൃതര്‍. കൊച്ചി അന്താരാഷ്ട്ര വിമാനത്താവളത്തില്‍ നിന്ന് ന്യൂഡല്‍ഹി ഇന്ദിരാഗാന്ധി അന്തര്‍ദേശീയ വിമാനത്താവളത്തിലേക്ക് പുറപ്പെടുകയായിരുന്ന എയര്‍ ഇന്ത്യ 504 വിമാനത്തിനാണ് എഞ്ചിന്‍ തകരാര്‍ കണ്ടെത്തിയതെന്ന് ബന്ധപ്പെട്ടവര്‍ അറിയിച്ചു.
വിമാനം ടേക്ക് ഓഫിനിടെ റണ്‍വേയില്‍ പെട്ടെന്ന് നിര്‍ത്തിയതാണ് സംശയമുണര്‍ത്തിയത്. റണ്‍വേയില്‍ നിന്ന് വിമാനം തെന്നിമാറിയതായി സംശയിക്കുന്നുവെന്ന് വിശദീകരിച്ച് യാത്രക്കാരന്‍ കൂടിയായ കോണ്‍ഗ്രസ് നേതാവ് എറണാകുളം എം പി കൂടിയായ ഹൈബി ഈഡന്‍ രംഗത്തു വന്നു. വിമാനത്തിന് എന്തോ അസ്വാഭാവികത സംഭവിച്ചുവെന്ന് തനിക്ക് തോന്നുന്നുവെന്ന് എം പി ഫെയിസ്ബുക് വഴി അറിയിക്കുകയായിരുന്നു.
രാത്രി 10.34 ന് പുറപ്പെടേണ്ട വിമാനം വൈകിയിട്ടും ടേക്ക് ഓഫ് ചെയ്തിട്ടില്ലെന്നും അ്‌ദ്ദേഹം വിശദീകരിച്ചു. അതേസമയം പിന്നീട് ഇട്ട മറ്റൊരു ഫെയിസ്ബുക് പോസ്റ്റില്‍ എയര്‍ഇന്ത്യ 504 റദ്ദാക്കിയതായും ്ഹൈബി ഈഡന്‍ പറഞ്ഞു.
എന്നാല്‍ എഞ്ചിനില്‍ ചില തകരാറുകള്‍ കണ്ടെത്തിയതിനെത്തുടര്‍ന്നാണ് വിമാനം ടേക്ക് ഓഫ് ചെയ്യാത്തതെന്ന് കൊച്ചി വിമാനത്താവള അധികൃതര്‍ അറിയിച്ചു. വിമാനം തെന്നിമാറിയിട്ടില്ലെന്ന് സി ഐ എ എല്‍ (സിയാല്‍) അധികൃതര്‍ സ്ഥിരീകരിച്ചു. പ്രശ്‌നം പരിഹരിച്ചുകൊണ്ട് ഇതേ വിമാനം അധികം വൈകാതെ പുറപ്പെടുമെന്നും അധികൃതര്‍ അറിയിച്ചെങ്കിലും വിമാനത്തിന്റെ യന്ത്ര തകരാര്‍ പരിഹരിക്കാന്‍ കഴിഞ്ഞില്ല. യാത്രക്കാര്‍ക്കായി മറ്റൊരു വിമാനം സജ്ജമാക്കിയെന്നും എല്ലാവരെയും കൃത്യമായി ന്യൂഡല്‍ഹിയില്‍ എത്തിക്കുമെന്നും കൊച്ചി വിമാനത്താവള അധികൃതര്‍ വ്യക്തമാക്കി.