ബെംഗളൂരു: വിവാഹാഭ്യർത്ഥന നിരസിച്ചതിനെ തുടർന്ന് യുവതിയെ ആൺസുഹൃത്ത് കുത്തിക്കൊലപ്പെടുത്തി. ബംഗാൾ സ്വദേശിനിയും ബെംഗളൂരുവിൽ സ്പാ ജീവനക്കാരിയുമായ ഫരീദ ഖാത്തൂൻ(42) ആണ് കൊല്ലപ്പെട്ടത്. നഗരത്തിൽ കാർ ഡ്രൈവറായി ജോലിചെയ്യുന്ന എൻ.എൽ. ഗിരീഷ് എന്ന റെഹാൻ അഹമദ്(32) ആണ് യുവതിയെ കൊലപ്പെടുത്തിയത്. കൃത്യം നടന്ന് മണിക്കൂറുകൾക്കുള്ളിൽ ഇയാൾ പോലീസ് സ്റ്റേഷനിലെത്തി കീഴടങ്ങി. മുഖത്തും കഴുത്തിലും നെഞ്ചിലും ക്രൂരമായി കുത്തി പരുക്കേൽപ്പിച്ചാണ് ഫരീദയെ കൊലപ്പെടുത്തിയത്. ബെംഗളൂരു ജയനഗറിലെ ശാലിനി മൈതാനത്ത് ശനിയാഴ്ചയായിരുന്നു സംഭവം. ഗിരീഷ് ജയനഗർ സ്വദേശിയാണ്.
2022 മുതൽ ഫരീദയും ഗിരീഷും സുഹൃത്തുക്കൾ ആയിരുന്നു. ഫരീദ ഭർത്താവിൽ നിന്നും വേർപിരിഞ്ഞു കഴിയുകയായിരുന്നു. ഇവർക്ക് രണ്ടു പെൺമക്കൾ ഉണ്ട്. അടുത്തിടെ ഫരീദയുടെ ഭർത്താവ് മരിച്ചതിനെത്തുടർന്ന് പെൺകുട്ടികളെ ഇവർ ബെംഗളൂരുവിലേക്ക് കൊണ്ടുവന്നിരുന്നു. കുട്ടികളെ നഗരത്തിലെ കോളേജിൽ ചേർക്കാനുള്ള ശ്രമത്തിലായിരുന്നു ഫരീദ.
ഇതിനിടയിലാണ് ഗിരീഷ് വിവാഹം ചെയ്യണമെന്ന് ആവശ്യപ്പെട്ട് നിരന്തരമായി ശല്യം ചെയ്യാൻ ആരംഭിച്ചത്. എന്നാൽ വിവാഹത്തിനുള്ള ആവശ്യം യുവതി നിരസിച്ചതോടെ പ്രകോപിതനായ യുവാവ് ഇവരെ ക്രൂരമായി കുത്തി കൊലപ്പെടുത്തുകയായിരുന്നു. ഏകദേശം 15 തവണ യുവതിക്ക് കുത്തേറ്റതായാണ് പ്രാഥമിക പരിശോധനയിലെ കണ്ടെത്തൽ.