കൊല്ലം: കൊല്ലത്ത് യുവാവിനെ അക്രമി സംഘം കുത്തികൊന്നു. കണ്ണനല്ലൂർ വെളിച്ചിക്കലയിൽ മുട്ടയ്ക്കാവ് സ്വദേശി നവാസി(35)നെയാണ് അക്രമിസംഘം കുത്തിക്കൊന്നത്. ഇന്നലെ രാത്രി പത്തരയോടെയാണ് സംഭവം.
സഹോദരൻ നബീലിനെയും സുഹൃത്ത് അനസിനെയും വഴിയിൽ തടഞ്ഞുവെച്ച് ആക്രമിച്ചത് ചോദ്യം ചെയ്യാനെത്തിയ നവാസിനെ വാക്കേറ്റത്തിനിടെ അക്രമികൾ കുത്തുകയായിരുന്നു. ക്രിമിനൽ പശ്ചാത്തലമുള്ള സംഘമാണ് കുത്തിയതെന്നാണ് വിവരം.
സഹോദരനും സുഹൃത്തും കണ്ണനല്ലൂരിൽ ഗൃഹപ്രവേശന ചടങ്ങിൽ പങ്കെടുത്ത് രാത്രി ബൈക്കിൽ മടങ്ങുന്നതിനിടെ, ബദരിയ സ്‌കൂളിന് സമീപത്ത് വച്ച് ഒരു സംഘം യുവാക്കൾ ഇരുവരെയും തടഞ്ഞുനിർത്തി മർദ്ദിക്കുകയായിരുന്നു. തുടർന്ന് ഇവർ പോലീസിൽ പരാതി നൽകി. പിന്നീട് ഫോണിൽ വിവരം അറിഞ്ഞ നവാസ് മുട്ടക്കാവിൽ അക്രമികളെ ചോദ്യം ചെയ്യാനെത്തുകയായിരുന്നു. മർദ്ദിച്ച സംഭവം ഇവരോട് ചോദിക്കുന്നതിനിടെയാണ് അക്രമികൾ പിന്നിൽ നിന്ന് നവാസിന്റെ കഴുത്തിൽ കത്തികൊണ്ട് കുത്തിയത്. നവാസ് തത്ക്ഷണം മരിച്ചതായാണ് പോലീസ് റിപോർട്ട്.
കൊലപാതക ദൃശ്യങ്ങൾ പുറത്തുവന്നിട്ടുണ്ട്. സി.സി.ടി.വി ദൃശ്യങ്ങളടക്കം പരിശോധിച്ച് അക്രമികളെ പിടികൂടാനുള്ള തീവ്ര ശ്രമത്തിലാണെന്ന് കണ്ണനല്ലൂർ പോലീസ് പ്രതികരിച്ചു.