തിരുവനന്തപുരം: കാരേറ്റ് പേടികുളത്ത് മദ്യലഹരിയിൽ യുവാവ് അയൽവാസിയെ വെട്ടിക്കൊന്നു. പേടികുളം ഉലങ്കത്തറ ക്ഷേത്രത്തിന് സമീപം കാട്ടുവിള വീട്ടിൽ ബാബുരാജ് (65) ആണ് കൊല്ലപ്പെട്ടത്. സംഭവത്തിൽ പ്രതി സുനിൽകുമാറി(45)നെ കസ്റ്റഡിയിലെടുത്തതായി പോലീസ് അറിയിച്ചു.
വെള്ളിയാഴ്ച രാത്രി എട്ടുമണിയോടെയാണ് സംഭവം. ചൂള തൊഴിലാളിയായ ബാബുരാജ് ജോലി കഴിഞ്ഞ് വീട്ടിലേക്ക് നടന്നുവരുമ്പോൾ മദ്യലഹരിയിൽ സുനിൽകുമാർ കൈവശമുണ്ടായിരുന്ന വെട്ടുകത്തി ഉപയോഗിച്ച് വെട്ടുകയായിരുന്നു. കഴുത്തിൽ ആഴത്തിൽ മുറിവേറ്റ ബാബുരാജിനെ നാട്ടുകാർ ഉടനെ മെഡിക്കൽ കോളേജ് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
ഇരു കുടുംബങ്ങളും തമ്മിൽ യാതൊരു പ്രശ്‌നവുമില്ലെന്നും സുനിൽകുമാർ മദ്യപിച്ച് പ്രദേശത്ത് സ്ഥിരം പ്രശ്‌നക്കാരനാണെന്ന് നാട്ടുകാർ പ്രതികരിച്ചു. മദ്യശല്യത്തെ തുടർന്നുള്ള പ്രശ്‌നങ്ങളാൽ പ്രതിയുടെ ഭാര്യയും മക്കളും സമീപത്തുള്ള കുടുംബ വീട്ടിലാണ് കഴിയുന്നത്.
പ്രമീളയാണ് മരിച്ച ബാബുരാജിന്റെ ഭാര്യ. രേവതി, ചിഞ്ചു എന്നിവർ മക്കളാണ്.