തിരുവനന്തപുരം– കോൺഗ്രസ് എംഎൽഎ രാഹുൽ മാങ്കുട്ടത്തിലിനെതിരെ ഗുരുതരമായ ആരോപണങ്ങളുമായി അതിജീവിത മുഖ്യമന്ത്രിയുടെ ഓഫീസിൽ നേരിട്ടെത്തി പരാതി നൽകി. പരാതിയോടൊപ്പം പുതിയ ശബ്ദരേഖകൾ, ഫോൺ രേഖകൾ, ചാറ്റ് സന്ദേശങ്ങൾ തുടങ്ങിയ തെളിവുകളും കൈമാറിയിരിക്കുന്നു. ഈ പരാതി ഉടൻ തന്നെ ക്രൈംബ്രാഞ്ചിന് കൈമാറുമെന്നാണ് സൂചന.
പുതിയ ശബ്ദരേഖകളും ചാറ്റുകളും പുറത്തുവന്നതിന് പിന്നാലെയാണ് അതിജീവിതയുടെ ഈ നീക്കം. നേരത്തെ തന്നെ പരാതി മുഖ്യമന്ത്രിക്ക് നൽകുമെന്ന് സൂചനകൾ ഉണ്ടായിരുന്നു. കുറേകാലമായി തുടരുന്ന മാനസിക സമ്മർദ്ദം, അധിക്ഷേപങ്ങൾ, അക്രമ സംഭവങ്ങൾ എന്നിവയാണ് അതിജീവിതയെ പരാതി നൽകാൻ പ്രേരിപ്പിച്ചത്.
പരാതിയുടെ പശ്ചാത്തലത്തിൽ പുതിയ ശബ്ദരേഖകളും ചാറ്റുകളും സോഷ്യൽ മീഡിയയിലൂടെ വ്യാപകമായി പ്രചരിക്കുന്നു. ഒരു ശബ്ദരേഖയിൽ രാഹുൽ മാങ്കുട്ടത്തിൽ ഗർഭഛിദ്രത്തിന് പ്രേരിപ്പിക്കുന്ന സംഭാഷണമാണ് ഉള്ളത്. മറ്റൊരു ചാറ്റ് സന്ദേശത്തിൽ “കുഞ്ഞിനെ വേണം” എന്ന് രാഹുൽ പറയുന്നത് പുറത്തുവന്നു. ഈ തെളിവുകൾ അതിജീവിതയുടെ പരാതിയോടൊപ്പം മുഖ്യമന്ത്രിയുടെ ഓഫീസിലെത്തിച്ചു. ഫോൺ കോൾ റെക്കോർഡുകളും ഈ സംഭാഷണങ്ങളുമായി ബന്ധപ്പെട്ട മറ്റ് രേഖകളും പരാതിയുടെ ഭാഗമാണ്.
രാഹുൽ മാങ്കുട്ടത്തിൽ ഇതുവരെ ആരാപണങ്ങൾക്കും പരാതികൾക്കുമെതിരെ പ്രതികരിച്ചിട്ടില്ല. നേരത്തെ ഉയർന്ന ലൈംഗിക പീഡന ആരോപണങ്ങളിൽ പാർട്ടി സസ്പെൻഷനിലായ അദ്ദേഹം, തദ്ദേശ തെരഞ്ഞെടുപ്പ് പ്രചാരണത്തിൽ പങ്കെടുക്കുന്നുണ്ടെങ്കിലും പാർട്ടി പരിപാടികളിൽ നിന്ന് വിട്ടുനിൽക്കുകയാണ്. യൂത്ത് കോൺഗ്രസ് നേതാവ് സജ്ന ബി. സാജന്റെ പരാതിയും പാർട്ടി ഹൈക്കമാൻഡിലെത്തിയ സാഹചര്യത്തിൽ, ഈ പുതിയ പരാതി കോൺഗ്രസിനകത്ത് വലിയ കോളിളക്കം സൃഷ്ടിച്ചിരിക്കുകയാണ്.