കൊച്ചി: കലൂർ ജവഹർലാൽ നെഹ്‌റു ഇന്റർ നാഷണൽ സ്റ്റേഡിയത്തിന്റെ വി.ഐ.പി ഗ്യാലറിയിൽ നിന്ന് വീണ് കോൺഗ്രസ് നേതാവും തൃക്കാക്കര എം.എൽ.എയുമായ ഉമ തോമസിനെ ഗുരുതര പരുക്കുകളോടെ ആശുപത്രിയിൽ പ്രവേശിപ്പിച്ചു.
കലൂർ സ്റ്റേഡിയത്തിൽ ഗിന്നസ് റെക്കോർഡ് ലക്ഷ്യമിട്ട് സംഘടിപ്പിച്ച 12000 ഭരതനാട്യ നർത്തകർ പങ്കെടുക്കുന്ന മൃദംഗനാദം നൃത്തസന്ധ്യ പരിപാടിക്ക് എത്തയതായിരുന്നു എം.എൽ.എ. താത്കാലികമായി തയ്യാറാക്കിയ വി.ഐ.പി ഗ്യാലറിയിൽ നിന്ന് 20 അടിയോളം താഴ്ചയിലേക്ക് എം.എൽ.എ വീണുവെന്നാണ് വിവരം.
പരിപാടി തുടങ്ങാറായപ്പോഴാണ് എം.എൽ.എ എത്തിയത്. മന്ത്രി സജി ചെറിയാനെ കണ്ട ശേഷം തന്റെ ഇരിപ്പിടത്തിലേക്ക് നീങ്ങിയിരിക്കാനായി പോകുമ്പോൾ, ഗ്യാലറിയിൽ താത്കാലികമായി കെട്ടിയ ബാരിക്കേഡിൽ നിന്ന് മറിഞ്ഞ് താഴേക്ക് വീഴുകയായിരുന്നു. സന്നദ്ധ പ്രവർത്തകർ ഉടൻ തന്നെ സ്റ്റേഡിയത്തിന് പുറത്തുണ്ടായിരുന്ന ആംബുലൻസിൽ കയറ്റി എം.എൽ.എയെ ആശുപത്രിയിൽ എത്തിക്കുകയായിരുന്നു.
കോൺക്രീറ്റിൽ തലയടിച്ചാണ് വീണതെന്ന് ദൃക്‌സാക്ഷികൾ പറഞ്ഞു. മുറിവിൽ നിന്ന് ഏറെ രക്തം വാർന്നുപോയെന്നാണ് പ്രാഥമിക വിവരം.