മദ്യലഹരിയിൽ ഓടിച്ച കാറിടിച്ച് പാലക്കാട്ട് രണ്ടു പേർക്ക് ദാരുണാന്ത്യം; ആളെ തിരിച്ചറിഞ്ഞില്ല

പാലക്കാട്: പാലക്കാട്ട് യുവാവ് മദ്യലഹരിയിൽ കാറോടിച്ച് രണ്ടു വയോധികർക്ക് ദാരുണാന്ത്യം. പാലക്കാട് കൊടുവായൂരിൽ ഇന്ന് ഉച്ചയ്ക്ക് 2.10-ഓടെയാണ് സംഭവം. മദ്യലഹരിയിൽ അമിത വേഗതയിൽ ഓടിച്ച കാറിടിച്ച് കാൽനട യാത്രക്കാരായ രണ്ടു വയോധികരാണ് മരിച്ചത്. ഇവരെ തിരിച്ചറിഞ്ഞിട്ടില്ല.

60 വയസുള്ള സ്ത്രീയും 65 വയസ് തോന്നിക്കുന്ന പുരുഷനുമാണ് മരിച്ചതെന്ന് പോലീസ് പറഞ്ഞു. വാഹനമോടിച്ച എലവഞ്ചേരി സ്വദേശി പ്രേംനാഥ് പി മേനോനെ കസ്റ്റഡിയിലെടുത്തതായും ഇയാൾ കടുത്ത മദ്യലഹരിയിലായിരുന്നുവെന്നും പോലീസ് പറഞ്ഞു.

കാൽനട യാത്രാക്കാരെ അമിത വേഗത്തിലെത്തിയ കാർ ഇടിച്ച് തെറിപ്പിക്കുകയായിരുന്നു. മൃതദേഹം പാലക്കാട് ജില്ലാ ആശുപത്രിയിലേക്ക് മാറ്റി. കാറിന് നമ്പർ പ്ലേറ്റ് ഇല്ലെന്നും പുതുതായി ഷോറൂമിൽനിന്ന് വാങ്ങി വരുന്നതിനിടെയാണോ അപകടമെന്ന് സംശയമുണ്ടെന്നും പോലീസ് പറഞ്ഞു.