കൊച്ചി: ലോക്സഭ തെരഞ്ഞെടുപ്പില്‍ തൃശൂരില്‍ വിജയിച്ച എന്‍ഡിഎ സ്ഥാനാർഥി സുരേഷ് ഗോപിക്ക് ആശംസകളുമായി മലയാള സിനിമാ താരങ്ങൾ.
മമ്മൂട്ടി, മോഹൻലാൽ, ദിലീപ്, ജ്യോതികൃഷ്ണ, ഭാമ, സുധീർ തുടങ്ങി നിരവധി താരങ്ങളാണ് സമൂഹ മാധ്യമങ്ങളിലൂടെ സുരേഷ് ഗോപിക്ക് ആശംസകൾ നേർന്നത്. 75,079 വോട്ടിനാണ് സുരേഷ് ഗോപിയുടെ വിജയം.
ലോക്സഭയിലേക്ക് തെരഞ്ഞെടുക്കപ്പെട്ട പ്രിയ സുരേഷിന് ഹൃദ്യമായ അഭിനന്ദനങ്ങൾ എന്നാണ് സുരേഷ് ഗോപിയുടെ ചിത്രവും പങ്കുവച്ച് മമ്മൂട്ടി ഫേസ്ബുക്കിൽ കുറിച്ചത്. പ്രിയ സുരേഷിന് അഭിനന്ദനങ്ങൾ എന്ന് മോഹൻലാലും.
409239 വോട്ടുകളാണ് സുരേഷ് ഗോപി നേടിയത്. എൽഡിഎഫ് സ്ഥാനാർഥി വി.എസ്. സുനിൽകുമാർ 334160 വോട്ടുകളാണ് നേടിയത്. മൂന്നാം സ്ഥാനത്തേക്ക് പിന്തള്ളപ്പെട്ട യുഡിഎഫ് സ്ഥാനാർഥി കെ. മുരളീധരന് ആകെ ലഭിച്ചത് 324431 വോട്ടുകൾ മാത്രമാണ്