കല്പ്പറ്റ – സുല്ത്താല് ബത്തേരിയുടെ പര് മാറ്റുമെന്ന ബി ജെ പി സംസ്ഥാന പ്രസിഡന്റും വയനാട്ടിലെ ബി ജെ പി സ്ഥാനാര്ത്ഥിയുമായ കെ.സുരേന്ദ്രന്റെ പ്രസ്താവനയെ തുടര്ന്നുള്ള വിവാദം കൊഴുക്കുന്നു. സുല്ത്താന് ബത്തേരിയുടെ യഥാര്ത്ഥ പേര് അതല്ലെന്നും ഗണപതിവട്ടം എന്നാണെന്നും കെ സുരേന്ദ്രന് ആവര്ത്തിച്ചു. സുല്ത്താന് ബത്തേരിയുടെ പേര് മാറ്റം അനിവാര്യമാണെന്ന് കെ സുരേന്ദ്രന് പറഞ്ഞു. വൈദേശിക ആധിപത്യത്തിന്റെ ഭാഗമായി വന്നതാണ് സുല്ത്താന് ബത്തേരി എന്ന പേര്. വിഷയം 1984ല് പ്രമോദ് മഹാജന് ഉന്നയിച്ചത് ആണെന്നും സുരേന്ദ്രന് പറഞ്ഞു. നേരത്തെ ഒരു ദേശീയ മാധ്യമത്തിന് നല്കിയ അഭിമുഖത്തില് സുല്ത്താന് ബത്തേരിയെന്നതല്ല യഥാര്ത്ഥ പേരെന്നും അത് ഗണപതിവട്ടമെന്നാണെന്നും താന് വയനാട്ടില് നിന്ന് ജയിച്ചാല് കേന്ദ്ര സര്ക്കാറില് ഇടപെട്ട് പേരുമാറ്റുമെന്നും കെ സുരേന്ദ്രന് പറഞ്ഞിരുന്നു. ഇക്കാര്യമാണിപ്പോള് കെ സുരേന്ദ്രന് വീണ്ടും ആവര്ത്തിച്ചത്. സുല്ത്താന്സ് ബാറ്ററി അല്ല അത് ഗണപതി വട്ടമാണ്. അത് ആര്ക്കാണ് അറിയാത്തതെന്ന് കെ സുരേന്ദ്രന് ചോദിച്ചു. ടിപ്പു സുല്ത്താന്റെ അധിനിവേശം കഴിഞ്ഞിട്ട് എത്രകാലമായി. അതിന് മുമ്പ് എന്തായിരുന്നു പേര് എന്ന് എല്ലാവര്ക്കും അറിയാമെന്നും കെ സുരേന്ദ്രന് പറഞ്ഞു. ടിപ്പു സുല്ത്താന് വരുന്നതിന് മുമ്പ് അങ്ങനെ ഒരു സ്ഥലമുണ്ടായിരുന്നില്ലേ? കോണ്ഗ്രസിനും എല് ഡി എഫിനും അതിനെ സുല്ത്താന് ബത്തേരി എന്ന് പറയുന്നതിനാണ് താല്പര്യം. അക്രമിയായ ഒരാളുടെ പേരില് ഇത്രയും നല്ലൊരു സ്ഥലം അറിയപ്പെടുന്നത് എന്തിനാണെന്ന ചോദ്യമാണ് താന് ചോദിച്ചതെന്നും കെ സുരേന്ദ്രന് പറഞ്ഞു.
അതേസമയം, സുല്ത്താന് ബത്തേരിയുടെ പേര് മാറ്റല് വിവാദത്തില് കെ സുരേന്ദ്രനെ പരിഹസിച്ച് കോണ്ഗ്രസ് രംഗത്തെത്തി. സുരേന്ദ്രന് എന്തും പറയാമെന്നും അദ്ദേഹം ജയിക്കാന് പോകുന്നില്ലെന്നും ടി സിദ്ധിഖ് എം എല് എ പറഞ്ഞു. ജനശ്രദ്ധ പിടിക്കാന് വേണ്ടിയുള്ള പ്രഖ്യാപനം മാത്രമാണിതെന്നും നടക്കാന് പോകുന്ന കാര്യമല്ലെന്നും അതിനൊരു വിലയും നല്കുന്നില്ല. സുരേന്ദ്രനെതിരെ സി പി എമ്മും രംഗത്തെത്തി. ആളുകളെ തമ്മിലടിപ്പിക്കാനുള്ള ശ്രമമാണിതെന്നും വയനാട്ടിലെ ജനങ്ങള് ആഗ്രഹിക്കാത്ത കാര്യമാണിതെന്നും കല്പ്പറ്റ മുന് എം എല് എ സി കെ ശശീന്ദ്രന് പറഞ്ഞു.