ആലപ്പുഴ– ഹൈബ്രിഡ് കഞ്ചാവ് കേസിൽ ചോദ്യം ചെയ്യലിനിടെ മയക്കുമരുന്ന് ഉപയോഗമുണ്ടെന്ന് സമ്മതിച്ച നടൻ ഷൈൻ ടോം ചാക്കോയെ തൊടുപുഴയിലെ ഡീ അഡിക്ഷൻ സെന്ററിലേക്ക് മാറ്റി. 10 മണിക്കൂറിലധികം നീണ്ട ചോദ്യംചെയ്യലിലാണ് ഷൈൻ ചികിത്സ തേടാൻ തയ്യാറാണെന്ന് അറിയിച്ചത്.
ആലപ്പുഴ എക്‌സൈസ് വകുപ്പിന്റെ അന്വേഷണത്തിലാണ് ഷൈൻ ടോം ചാക്കോ, അഭിനേതാവ് ശ്രീനാഥ് ഭാസി, മോഡൽ കെ സൗമ്യ എന്നിവരെ ചോദ്യം ചെയ്യലിന് ഹാജരായത്. ഹൈബ്രിഡ് കഞ്ചാവ് വിതരണകേസിലെ മുഖ്യപ്രതി തസ്‌ലിമ സുൽത്താനയുടെ മൊഴി അടിസ്ഥാനമാക്കിയായിരുന്നു ഇവരെ ചോദ്യം ചെയ്തത്.
തസ്‌ലീനയും കൂട്ടാളിയും ആലപ്പുഴയിലെ ഒരു റിസോർട്ടിൽ നിന്നാണ് പിടിയിലായത്. ഇവരിൽ നിന്ന് വലിയ തോതിൽ ഹൈബ്രിഡ് കഞ്ചാവ് കണ്ടെത്തിയിരുന്നു. മയക്കുമരുന്നുമായി നേരിട്ട് ബന്ധമില്ലെന്ന് വ്യക്തമായതോടെ ശ്രീനാഥ് ഭാസിയെയും കെ. സൗമ്യയെയും എക്‌സൈസ് വിട്ടയച്ചു.
ഇതിനിടെ, സംവിധായകരായ ഖാലിദ് റഹ്‌മാന്റെയും അശ്‌റഫ് ഹംസയുടെയും ബന്ധമുള്ള മറ്റൊരു കേസിൽ പ്രത്യേക അന്വേഷണ സംഘം രൂപീകരിക്കുകയാണ്. അസിസ്റ്റന്റ് എക്‌സൈസ് കമ്മീഷണർ (എൻഫോഴ്സ്മെന്റ്) എഫ്.എസ്. സുരേഷിന്റെ നേതൃത്വത്തിലാണ് അന്വേഷണസംഘം പ്രവർത്തിക്കുന്നത്.
ഷൈൻ ടോം ചാക്കോയും മറ്റ് ചിലരും കൂടിച്ചേർന്ന് സിനിമറ്റോഗ്രാഫർ സമീർ താഹിറിന്റെ ഉടമസ്ഥതയിലുളള അപ്പാർട്ട്‌മെന്റിലായിരുന്നുവെന്ന് അന്വേഷണത്തിൽ വ്യക്തമാകുന്നു. സമീറിനേയും ഉടൻ ചോദ്യം ചെയ്യാനാണ് സാധ്യത.