(ചടയമംഗലം)കൊല്ലം: സ്‌കൂൾ കലോത്സവത്തിനിടെ പ്ലസ് വൺ വിദ്യാർത്ഥിനിക്കു നേരെ ലൈംഗികാതിക്രമം നടത്തിയെന്ന പരാതിയിൽ പാരലൽ കോളജ് പ്രിൻസിപ്പൽ അറസ്റ്റിൽ. കൊല്ലം കടയ്ക്കലിൽ കുമ്മിൽ മുക്കം സ്വദേശി അഫ്‌സൽ ജലാലാണ് അറസ്റ്റിലായതെന്ന് പോലീസ് പറഞ്ഞു.
ഏഴാം തിയ്യതി ചടയമംഗലം ഉപജില്ല സ്‌കൂൾ കലോത്സവത്തിനിടെയാണ് കേസിനാസ്പദമായ സംഭവമുണ്ടായത്. സ്‌കൂളിന് സമീപത്തെ പാരലൽ കോളേജുകളും കലോത്സവ വേദികളായിരുന്നു. മത്സരത്തിൽ പങ്കെടുക്കാനെത്തിയ വിദ്യാർത്ഥിനിയെ അഫ്‌സൽ കടന്നുപിടിക്കുകയായിരുന്നു.
സംഭവത്തിന് പിന്നാലെ കുതറി ഓടിയ പെൺകുട്ടി കനത്ത മാനസിക സമ്മർദ്ദത്തിലായിരുന്നു. തുടർന്ന് മാതാപിതാക്കൾ കടയ്ക്കൽ പോലീസിൽ പരാതി നൽകുകയായിരുന്നു.
പെൺകുട്ടിയോട് അഫ്‌സൽ ജലാൽ പ്രണയാഭ്യർത്ഥന നടത്തിയെന്നും പരാതിയിലുണ്ട്. മുമ്പും സമാന രീതിയിൽ ഇയാൾ ഉപദ്രവിക്കാൻ ശ്രമിച്ചതായും മൊഴിയുണ്ടെന്ന് പോലീസ് പറഞ്ഞു.
കേസെടുത്തതിന് പിന്നാലെ ഒളിവിൽ പോയ പ്രതിക്കെതിരെ പോക്‌സോ വകുപ്പുകൾ അടക്കം ചുമത്തിയിട്ടുണ്ട്. വൈദ്യ പരിശോധനയ്ക്ക് ശേഷം പ്രതിയെ കോടതിയിൽ ഹാജരാക്കി റിമാൻഡ് ചെയ്തതായി പോലീസ് അറിയിച്ചു.