- പാണക്കാട് കുടുംബത്തെ സമസ്തയിൽനിന്ന് മാറ്റിനിർത്താൻ ആര് ശ്രമിച്ചാലും നടക്കില്ലെന്ന് എസ്.വൈ.എസ് സംസ്ഥാന സെക്രട്ടറി അബ്ദുസ്സമദ് പൂക്കോട്ടൂർ. സമസ്തയിൽ ഇനിയൊരു പിളർപ്പ് ഉണ്ടാകില്ലെന്നും അതിന് ആരും കൊതിക്കേണ്ടെന്നെന്നും അദ്ദേഹം വ്യക്തമാക്കി.
- പരിപാടിക്കു കാരണം സമസ്തയുടെ വിലക്ക് മറികടന്ന് ചില മുശാവറ അംഗങ്ങൾ പ്രസ്താവന ഇറക്കിയതെന്ന് വിശദീകരണം
മലപ്പുറം: മുസ്‌ലിം ലീഗ് നേതാവ് പാണക്കാട് സയ്യിദ് സാദിഖലി ശിഹാബ് തങ്ങൾക്കും ഖാസി ഫൗണ്ടേഷനെതിരേയും രംഗത്തുവന്ന സമസ്ത നേതാവ് ഉമർ ഫൈസി മുക്കത്തെ പണ്ഡിതസഭയായ മുശാവറയിൽ നിന്ന് പുറത്താക്കണമെന്ന് ആവശ്യം. ഉമർ ഫൈസിക്കെതിരേ എടവണ്ണപ്പാറയിൽ സംഘടിപ്പിച്ച സമസ്ത മേഖല കോ-ഓർഡിനേഷൻ കമ്മിറ്റിയുടെ ആദർസമ്മേളനത്തിലാണ് സംഘടന ഇതുസംബന്ധിച്ച് പ്രമേയം പാസാക്കിയത്.
സമസ്തയുടെയും എസ്.വൈ.എസിന്റെയും സംസ്ഥാന നേതാക്കൾ ഉമർ ഫൈസിക്കെതിരെ സമ്മേളനത്തിൽ തുറന്നടിച്ചു. പാണക്കാട് കുടുംബത്തെ സമസ്തയിൽനിന്ന് മാറ്റിനിർത്താൻ ആര് ശ്രമിച്ചാലും നടക്കില്ലെന്ന് പറഞ്ഞ എസ്.വൈ.എസ് സംസ്ഥാന സെക്രട്ടറി അബ്ദുസ്സമദ് പൂക്കോട്ടൂർ ഉമർ ഫൈസിക്ക് പിന്തുണ നൽകിയ സമസ്ത മുശാവറ അംഗങ്ങളുടെ നടപടിയെയും വിമർശിച്ചു. സമസ്തയുടെ വിലക്ക് മറികടന്നാണ് ചില മുശാവറ അംഗങ്ങൾ പ്രസ്താവന ഇറക്കിയത്.
ഈ സമ്മേളനം നടത്തുന്നത് സംബന്ധിച്ച് സമസ്ത സെക്രട്ടറി എം.ടി അബ്ദുല്ല മുസ്‌ലിയാരെ അറിയിച്ചിരുന്നു. ആക്ഷേപപ്രസംഗം പാടില്ല, അത് പിന്നീട് പ്രശ്‌നങ്ങൾ ഉണ്ടാക്കുമെന്നായിരുന്നു മറുപടി. എന്നാൽ, സമസ്ത വിശദീകരണത്തിനുശേഷം ഉമർ ഫൈസിയെ പിന്തുണച്ച് വീണ്ടും പ്രസ്താവന വന്നു. ആ പ്രസ്താവന കൊണ്ടുമാത്രമാണ് ഈ പരിപാടി നടത്തുന്നത്. സമസ്തയിൽ ഇനിയൊരു പിളർപ്പ് ഉണ്ടാകില്ലെന്നും അതിന് ആരും കൊതിക്കേണ്ടെന്നെന്നും അബ്ദുസ്സമദ് പൂക്കോട്ടൂർ വ്യക്തമാക്കി.
സി.പി.എമ്മിന് വേണ്ടിയാണ് ഉമർ ഫൈസിയുടെ സമാന്തര പ്രവർത്തനമെന്നും സമ്മേളനത്തിൽ വിമർശം ഉയർന്നു. ഉമർ ഫൈസിയെ മാറ്റിനിർത്തി സമസ്തയെ ശുദ്ധീകരിക്കണമെന്ന് ചടങ്ങിൽ പ്രസംഗിച്ച എസ് വൈ എസ് സംസ്ഥാന ഉപാധ്യക്ഷൻ കെ എ റഹ്മാൻ ഫൈസി പറഞ്ഞു.
ലീഗും സമസ്തയും തമ്മിലുള്ള നല്ല ബന്ധം തകർക്കലാണ് വിവാദങ്ങളുടെ ലക്ഷ്യം. തർക്കം സമസ്ത-ലീഗ് പ്രശ്‌നമായി അവതരിപ്പിക്കാൻ ആസൂത്രിത ശ്രമം നടക്കുകയാണെന്നും പാണക്കാട് കുടുംബത്തിനെതിരേ വ്യാജ പ്രചാരണങ്ങൾ അഴിച്ചുവിടാനും നേതാക്കളെ പൊതു ഇടങ്ങളിൽ ഇകഴ്ത്താനുമുള്ള ശ്രമങ്ങളെ ചെറുക്കണമെന്നും അദ്ദേഹം ആവശ്യപ്പെട്ടു. ചടങ്ങിൽ നാസർ ഫൈസി കൂടത്തായ് ഉൾപ്പെടെയുള്ള നേതാക്കൾ പ്രസംഗിച്ചു.