തിരുവനന്തപുരം: ഛത്തീസ്ഗഢില്‍ മതപരിവര്‍ത്തന ആരോപണത്തെ തുടര്‍ന്ന് കന്യാസ്ത്രീകളെ അറസ്റ്റ് ചെയ്ത സംഭവത്തില്‍ ബിജെപിയുടെ നിലപാടിനെതിരെ ആര്‍എസ്എസ് അതൃപ്തി പ്രകടിപ്പിച്ചു. ബിജെപി ഛത്തീസ്ഗഢിലേക്ക് ഒരു സംഘത്തെ അയച്ചതും കന്യാസ്ത്രീകള്‍ക്ക് അനുകൂലമായ നിലപാട് സ്വീകരിച്ചതും അതൃപ്തിക്ക് കാരണമായി. ഈ വിഷയം സംഘപരിവാറിനുള്ളിലെ ഭിന്നതകള്‍ വെളിവാക്കുന്നതായി രാഷ്ട്രീയ നിരീക്ഷകര്‍ വിലയിരുത്തുന്നു.
ബിജെപി സംസ്ഥാന അധ്യക്ഷന്‍ രാജീവ് ചന്ദ്രശേഖറിന്റെ ഫേസ്ബുക്ക് പോസ്റ്റിനെതിരെ മുതിര്‍ന്ന ആര്‍എസ്എസ് നേതാക്കള്‍ രംഗത്തെത്തി. ബജ്‌റംഗ്ദള്‍ ഒരു സ്വതന്ത്ര സംഘടനയാണെന്ന രാജീവിന്റെ പരാമര്‍ശം സംഘപരിവാര്‍ നേതാക്കള്‍ക്ക് കടുത്ത അതൃപ്തിയുണ്ടാക്കി. രാജീവ് ക്രൈസ്തവ സമുദായത്തെ പ്രീണിപ്പിക്കാന്‍ ശ്രമിക്കുന്നുവെന്നാണ് ആര്‍എസ്എസിന്റെ പ്രധാന വിമര്‍ശനം.
‘പറക്കുന്ന പക്ഷി മനോഹരമാണ്, അതിനെ പിടിക്കണമെന്നത് നല്ല ലക്ഷ്യമാണ്. എന്നാല്‍, കൈവശമുള്ളവയെ നഷ്ടപ്പെടുത്താതെ സൂക്ഷിക്കണം,’ എന്ന് ഹിന്ദു ഐക്യവേദി നേതാവ് ശശികല പ്രതികരിച്ചു. ബിജെപി നിലപാടിനോടുള്ള ഹിന്ദുത്വ സംഘടനകളുടെ അമര്‍ഷത്തെ ഈ പ്രസ്താവന പ്രതിഫലിപ്പിക്കുന്നു.
‘ഹിന്ദുക്കളെ മതപരിവര്‍ത്തനം ചെയ്യുന്ന പ്രവര്‍ത്തനങ്ങള്‍ ആരു നടത്തിയാലും ശക്തമായി എതിര്‍ക്കും. അന്വേഷണം പൂര്‍ത്തിയാകുംമുമ്പ് കുറ്റാരോപിതരെ നിരപരാധികളായി പ്രഖ്യാപിക്കുന്നത് ഇരകള്‍ക്ക് നീതിനിഷേധിക്കലാണ്,’ എന്ന് ഹിന്ദു ഐക്യവേദി വ്യക്തമാക്കി.
‘ആകാശത്ത് പറക്കുന്ന കുരുവിയെ പിടിക്കാനുള്ള വ്യാമോഹത്തില്‍ കൈവശമുള്ള പ്രാവിനെ കളയണോ?’ എന്ന് മുന്‍ ഡിജിപി ടി.പി. സെന്‍കുമാര്‍ ചോദിച്ചു.