കൊച്ചി: ബെവ്‌കോ വിൽപനശാലയിൽ നിന്ന് മദ്യക്കുപ്പി എടുത്തോടിയ പോലീസുകാരൻ പിടിയിൽ. കളമശ്ശേരി എ.ആർ ക്യാമ്പിലെ ഡ്രൈവർ കെ.കെ ഗോപിയെയാണ് ജീവനക്കാർ പിടികൂടി പോലീസിനെ ഏൽപ്പിച്ചത്. എറണാകുളം പട്ടിമറ്റത്ത് പട്ടാപ്പകലാണ് സംഭവം.
മദ്യക്കുപ്പി എടുത്ത ശേഷം കൗണ്ടറിലുണ്ടായിരുന്ന സ്ത്രീയോട് ഇയാൾ മോശമായി സംസാരിച്ചതായും പരാതിയുണ്ട്. പണം ആവശ്യപ്പെട്ടപ്പോൾ മദ്യക്കുപ്പിയുമെടുത്ത് പ്രതി ഓടുകയായിരുന്നു. പ്രവേശന വാതിലിൽ തടയാൻ ശ്രമിച്ച ജീവനക്കാരിയെ ഇയാൾ തള്ളി മാറ്റിയാണ് രക്ഷപ്പെടാൻ ശ്രമിച്ചത്.
പിന്നീട് ജീവനക്കാർ ഇയാളെ പിന്തുടർന്ന് തടഞ്ഞുവയ്ക്കുകയും മദ്യക്കുപ്പി തിരികെ വാങ്ങുകയുമായിരുന്നു. ബെവ്‌കോ ജീവനക്കാരുടെ പരാതിയിൽ സ്ത്രീയെ അതിക്രമിച്ചതുൾപ്പെടെയുള്ള വകുപ്പുകൾ ചുമത്തി ഇയാളുടെ അറസ്റ്റ് രേഖപ്പെടുത്തിയതായി പോലീസ് പറഞ്ഞു. പ്രതിക്കെതിരെ വകുപ്പുതല നടപടി കൂടി ഉണ്ടാവുമെന്നാണ് വിവരം.
