മുനമ്പത്ത് നോട്ടീസ് അയച്ചത് ടി.കെ ഹംസ ചെയർമാനായപ്പോൾ; മറുപടിയുമായി പാണക്കാട് റഷീദലി ശിഹാബ് തങ്ങൾ

• മുനമ്പത്ത് മാനുഷിക പരിഗണന വച്ച് ഒരാളെയും ഇറക്കിവിടരുതെന്നും റഷീദലി ശിഹാബ് തങ്ങൾ

കൊച്ചി: മുനമ്പത്തെ കുടുംബങ്ങൾക്ക് താൻ ചെയർമാനായിരുന്ന കാലത്ത് ഒരു നോട്ടീസ് പോലും നൽകിയിട്ടില്ലെന്ന് വഖഫ് ബോർഡ് മുൻ ചെയർമാൻ പാണക്കാട് റഷീദലി ശിഹാബ് തങ്ങൾ. സിപിഎം നേതാവ് ടി.കെ ഹംസ ചെയർമാനായിരുന്നപ്പോഴാണ് മുനമ്പത്തെ കുടുംബങ്ങൾക്ക് നോട്ടീസ് അയച്ചതെന്നും അതല്ലാതെ താനല്ലെന്നും റഷീദലി തങ്ങൾ പറഞ്ഞു. മുനമ്പം വിഷയത്തിൽ മന്ത്രി വി അബ്ദുറഹ്മാന്റെ ആരോപണത്തിൽ മാധ്യമങ്ങളോട് പ്രതികരിക്കുകയായിരുന്നു അദ്ദേഹം.

വി.എസ് സർക്കാരിന്റെ അതേ നിലപാടായിരുന്നു മുനമ്പം വിഷയത്തിൽ പിണറായി സർക്കാരിനും. 2008 കാലത്ത് വി.എസ് സർക്കാർ നിയമിച്ച നിസാർ കമ്മിഷൻ റിപോർട്ട് പ്രകാരമാണ് വഖഫ് ബോർഡിന് ഭൂമി തിരിച്ചുപിടിക്കാൻ 2016-ൽ ഹൈക്കോടതി ഉത്തരവുണ്ടായത്. എന്നാൽ, വഖഫ് ബോർഡ് നോട്ടീസ് അയച്ചില്ല. ഒടുവിൽ കോടതി അലക്ഷ്യ നോട്ടീസ് വന്നു. പിന്നീട് ഭൂമി തിരിച്ചുപിടിക്കണമെന്ന് നോട്ടീസ് അയച്ചത് എനിക്കുശേഷം വന്ന വഖഫ് ബോർഡ് കമ്മിറ്റിയാണ്. ടി.കെ ഹംസയായിരുന്നു അന്ന് ചെയർമാൻ, അല്ലാതെ താനല്ല. കോടതി അലക്ഷ്യമാവും എന്നതുകൊണ്ടാണ് പരിഗണിക്കേണ്ടി വന്നത്.

മുനമ്പത്തെ കുടുംബങ്ങൾക്ക് താൻ ചെയർമാനായിരുന്നപ്പോൾ ഒരു നോട്ടീസ് പോലും അയച്ചിട്ടില്ല. പാവപ്പെട്ട കുടുംബങ്ങളാണ് അവിടെ താമസിക്കുന്നതെന്നും മാനുഷിക പരിഗണനവച്ച് അവരെ ഇറക്കിവിടുന്നത് ശരിയല്ലെന്നും റഷീദലി തങ്ങൾ പറഞ്ഞു.

സംസ്ഥാന സർക്കാരിനാണ് ഇപ്പോഴും വിഷയം പരിഹരിക്കാൻ കഴിയുക. 2014 മുതൽ 2019 വരെയാണ് താൻ വഖഫ് ബോർഡ് ചെയർമാൻ ആയത്. മറിച്ചുള്ള കുറ്റപ്പെടുത്തലൊന്നും വസ്തുതാപരമായി ശരിയല്ലെന്നും അദ്ദേഹം വ്യക്തമാക്കി.