- ട്രോഫി പങ്കുവെച്ചതിനെച്ചൊല്ലി തർക്കം
- ട്രോഫിയുടെ യഥാർത്ഥ അവകാശികൾ തങ്ങളെന്ന് നീലേശ്വരം ഗവ. സ്‌കൂൾ
- ആരോപണത്തിൽ കഴമ്പില്ലെന്ന് സംഘാടകർ
(മുക്കം) കോഴിക്കോട്: കൊടിയത്തൂർ പി.ടി.എം ഹയർ സെക്കൻഡറി സ്‌കൂളിൽ സമാപിച്ച മുക്കം ഉപജില്ലാ സ്‌കൂൾ കലോത്സവത്തിന്റെ സമാപനം കൂട്ടത്തല്ലിൽ കലാശിച്ചു. വ്യാഴാഴ്ച രാത്രിയാണ് സംഭവം.
ഓവറോൾ ചാമ്പ്യൻഷിപ്പ് പങ്കുവെച്ചതിനെച്ചൊല്ലിയുള്ള തർക്കം കയ്യാങ്കളിയിലേക്കു നീങ്ങുകയായിരുന്നു. നീലേശ്വരം ഗവ. ഹയർ സക്കൻഡറി സ്‌കൂളും ആതിഥേയരായ കൊടിയത്തൂർ പി ടി എം ഹയർ സെക്കൻഡറി സ്‌കൂളുമാണ് തുല്യ പോയിന്റുമായി ട്രോഫി പങ്കിട്ടത്.
തങ്ങളാണ് യഥാർത്ഥ ചാമ്പ്യന്മാരെന്നും ആതിഥേയർ സ്വാധീനിച്ചും കൃത്രിമം കാണിച്ചുമാണ് നേട്ടമുണ്ടാക്കിയതെന്നാണ് നീലേശ്വരം സ്‌കൂളിന്റെ ആരോപണം. പി ടി എമ്മുകാർ അനധികൃതമായി മത്സരാർത്ഥികളെ തിരുകിക്കയറ്റിയെന്നും വിധി നിർണ്ണയത്തിൽ കൃത്രിമത്വം കാണിച്ചും അനർഹമായാണ് ട്രോഫിക്ക് അവകാശവാദം ഉന്നയിച്ചതെന്നും നീലേശ്വരത്തുകാർ ആരോപിച്ചു.
എന്നാൽ, ഈ ആരോപണങ്ങളൊന്നും വസ്തുതാപരമായി ശരിയല്ലെന്നും സത്യസന്ധമായ വിധിനിർണയത്തിന്റെ ബലത്തിൽ കുട്ടികൾ മത്സരിച്ചുതന്നെയാണ് ഇത്തവണയും മികവ് ആവർത്തിച്ചതെന്ന് പി.ടി.എം അധികൃതർ വ്യക്തമാക്കി. സംഭവിച്ചത് ദൗർഭാഗ്യകരമാണെന്നും ഇല്ലാക്കഥകൾ പ്രചരിപ്പിച്ച് മികച്ച നിലയിൽ സംഘടിപ്പിച്ച മേളയുടെ ശോഭ കെടുത്തുന്നത് ആരായാലും അംഗീകരിക്കാവതല്ലെന്നും സംഘാടകർ വ്യക്തമാക്കുന്നു.
നീലേശ്വരം സ്‌കൂൾ അധികൃതർ ട്രോഫി വാങ്ങാൻ വിസമ്മതിച്ചതോടെയാണ് പ്രശ്‌നങ്ങൾക്ക് തുടക്കം. ആദ്യം വിദ്യാർത്ഥികൾ തമ്മിലും പിന്നീട് സംഘാടകരും അധ്യാപകരും തമ്മിലുണ്ടായ അഭിപ്രായ ഭിന്നത പൊരിഞ്ഞ വാക്കേറ്റത്തിലും കയ്യാങ്കളിയിലേക്കും നീങ്ങുകയായിരുന്നു. വിദ്യാർത്ഥികൾ തമ്മിലുണ്ടായ പൊരിഞ്ഞ വാഗ്വാഗത്തിൽ ചില അധ്യാപകർ കൂടി കക്ഷി ചേർന്നതോടെ കൂട്ടത്തല്ലിൽ കലാശിക്കുകയായിരുന്നു.
വളണ്ടിയർമാരും മറ്റും പ്രശ്‌നക്കാരെ പിടിച്ചുമാറ്റാൻ ശ്രമിച്ചെങ്കിലും രംഗം യഥാസമയം ശാന്തമാക്കാനായില്ല. സംഘർഷാന്തരീക്ഷം ഒഴിവാക്കാൻ ശ്രമിച്ച അധ്യാപകർക്കും രക്ഷിതാക്കൾക്കും കൂട്ടപ്പൊരിച്ചിലിനിടെ അടി കിട്ടി. ചില വിദ്യാർത്ഥികൾക്ക് രക്തം പൊടിഞ്ഞതായും വിവരമുണ്ട്.