കോഴിക്കോട്: മുഖ്യമന്ത്രി പിണറായി വിജയനും പൊളിട്ടിക്കൽ സെക്രട്ടറി പി ശശിക്കും സി.പി.എം സംസ്ഥാന സെക്രട്ടറി എം.വി ഗോവിന്ദനുമെതിരേ അതീവ ഗുരുതരമായ ആരോപണങ്ങൾ തൊടുത്ത നിലമ്പൂർ എം.എൽ.എ പി.വി അൻവറിന് മുന്നറിയിപ്പുമായി ആർ.എം.പി.ഐ നേതാവ് കെ.കെ രമ എം.എൽ.എ.
സി.പി.എമ്മിന് വടകരയിൽ കടുത്ത വെല്ലുവിളി ഉയർത്തിയ ടി.പി ചന്ദ്രശേഖരനെ വെട്ടിക്കൊന്നപ്പോൾ സി.പി.എമ്മിനു നേരെ അന്വേഷണം വരാതിരിക്കാൻ പ്രചരിപ്പിച്ച ‘ഇന്നോവ, മാഷാ അള്ളാ!!’ എന്ന ഫേസ്ബുക്ക് സ്റ്റിക്കർ കുറിപ്പാണ് രമ ഓർമിപ്പിച്ചത്. ഇതോടെ ‘അൻവറിനെ തേടിയും ടി.പിയെ വെട്ടിക്കൊന്ന ഇന്നോവ എത്തുമോയെന്നാണ് കണ്ടറിയേണ്ടതെന്ന്’ പലരും പ്രതികരിച്ചിട്ടുണ്ട്.
പിണറായി വിജയൻ എന്ന സൂര്യൻ കെട്ടുപോയി. മുഖ്യമന്ത്രിയുടെ ഗ്രാഫ് നൂറിൽ നിന്ന് പൂജ്യത്തിലായി. മുഖ്യമന്ത്രി അദ്ദേഹത്തിന്റെ മുക്കിന് താഴെ നടന്ന സംഭവം അറിഞ്ഞില്ല. എ.ഡിജി.പിയുടെ വാറോലയാണ് സി.എം വായിക്കുന്നത്. അഭ്യന്തര വകുപ്പ് വഹിക്കാനുള്ള അർഹത മുഖ്യമന്ത്രിക്ക് ഇല്ല. അദ്ദേഹവും മരുമകൻ മന്ത്രി റിയാസും മാത്രം മതിയോ പാർട്ടിയിൽ, പി ശശി കാട്ടുകള്ളനാണ്. സി.പി.എമ്മിൽ അടിമത്തമാണ്. ഉപജാപ സംഘമാണ് നയിക്കുന്നത്. പാർട്ടിക്ക് തിരുത്താനാകുന്നില്ലെന്നും അറിയുന്നതെല്ലാം പറഞ്ഞാൽ സഖാക്കൾ എ.കെ.ജി സെന്റർ പൊളിച്ചടക്കുമെന്നടക്കമുള്ള ഗുരുതരമായ രാഷ്ട്രീയ ബോംബാണ് പി.വി അൻവർ ഇന്ന് മുഖ്യമന്ത്രിക്കെതിരെ തൊടുത്തത്.