വിവാഹ വാഗ്ദാനം നൽകി പെൺകുട്ടിയെ തട്ടിക്കൊണ്ടുപോയി; യുവതിയടക്കം മൂന്നുപേർ തിരൂരിൽ പിടിയിൽ

തിരുവനന്തപുരം: വിവാഹ വാഗ്ദാനം നൽകി 17-കാരിയെ തട്ടിക്കൊണ്ടുപോയ മൂന്നംഗ സംഘം പിടിയിൽ. ചേരമാൻ തുരുത്ത് സ്വദേശി തൗഫീഖ്(24), പെരുമാതുറ സ്വദേശികളായ അഫ്‌സൽ(19), സുൽഫത്ത്(22) എന്നിവരാണ് അറസ്റ്റിലായത്.

പെൺകുട്ടിയെ ട്രെയിനിൽ കൊണ്ടുവരുന്നതിനിടെ തിരൂരിൽ വച്ചാണ് സംഘം പിടിയിലായത്. പോലീസിൽ നിന്ന് രക്ഷപ്പെടാൻ ശ്രമിക്കുന്നതിനിടെയാണ് സംഘത്തിന് പിടി വീണത്.

കഴിഞ്ഞ തിങ്കളാഴ്ചയാണ് പെരുമാതുറയിൽനിന്നും 17-കാരിയെ കാണാനില്ലെന്ന് കാണിച്ച് വീട്ടുകാർ കഠിനാംകളും പോലീസിൽ പരാതി നൽകിയത്. തുടർന്നുള്ള അന്വേഷണത്തിൽ കുട്ടിയെ ചിറയിൻകീഴ് എത്തിച്ച ശേഷം ട്രെയിനിൽ തട്ടിക്കൊണ്ടുപോയതാണെന്ന് തിരിച്ചറിയുയകയായിരുന്നു.

പെൺകുട്ടി മുമ്പ് പീഡിപ്പിക്കപ്പെട്ടതായി കണ്ടെത്തിയതോടെ പോക്‌സോ വകുപ്പും ചുമത്തിയതായി പോലീസ് പറഞ്ഞു. പ്രതികളെ കോടതിയിൽ ഹാജറാക്കി റിമാൻഡ് ചെയ്തു.