കോഴിക്കോട്- കേരള സാഹിത്യ അക്കാദമിയുടെ സിബി കുമാര്‍ എന്‍ഡോവ്‌മെന്റ് ഉപന്യാസ പുരസ്‌കാരത്തിന് തെരെഞ്ഞെടുക്കപ്പെട്ട എം.സ്വരാജിന്റെ ‘പൂക്കളുടെ പുസ്തകം’ അവാര്‍ഡിനായി കേരള സാഹിത്യ അക്കാദമി നേരിട്ട് തെരെഞ്ഞെടുക്കുകയായിരുന്നുവെന്ന് സ്ഥിരീകരണം. തന്റെ രചനക്ക് ലഭിച്ച അവാര്‍ഡ് എം.സ്വരാജ് നിരസിച്ചതോടെ സമൂഹ മാധ്യമങ്ങളില്‍ ഇത് ചര്‍ച്ചയാവുകയും ചിലര്‍ അയച്ചുകൊടുക്കാതെ അവാര്‍ഡ് കിട്ടുമോ എന്ന തരത്തില്‍ വിമര്‍ശനമുന്നയിക്കുകയും ചെയ്തിരുന്നു. ‘‘കേരള സാഹിത്യ അക്കാദമി രണ്ടു തരത്തിലാണ് പുസ്തകം തെരെഞ്ഞെടുക്കാറുള്ളത്. ആരെങ്കിലും അയച്ചുതരുന്നത് പരിഗണിക്കും. മറ്റൊന്ന് അക്കാദമിയില്‍ തന്നെയുള്ള മികച്ച പുസ്തകങ്ങള്‍ തെരെഞ്ഞെടുക്കും. അത്തരത്തില്‍ അക്കാദമിയില്‍ ഉള്ളത് തെരെഞ്ഞെടുത്തതാണ് എം.സ്വരാജിന്റെ പുസ്തകം.” കേരള സാഹിത്യ അക്കാദമി സെക്രട്ടറി പ്രഫ. സിപി അബൂബക്കര്‍ ‘ദ മലയാളം ന്യൂസി’നോട് പറഞ്ഞു. തങ്ങള്‍ പുസ്തകം അയച്ചുകൊടുക്കാറില്ലെന്ന് ‘പൂക്കളുടെ പുസ്തകം’ പ്രസിദ്ധീകരിച്ച കോട്ടയം ഡിസി ബുക്‌സും അറിയിച്ചു. ”ഒരു അവാര്‍ഡുകള്‍ക്കും തങ്ങള്‍ പുസ്തകം അയച്ചുകൊടുക്കാറില്ല. ഒരു വര്‍ഷം മുന്നൂറോളം പുസ്തകങ്ങള്‍ പബ്ലിഷ് ചെയ്യുന്ന സ്ഥാപനമാണ് ഡിസി ബുക്‌സ്.” ഡിസി ബുക്‌സിന്റെ ഡപ്യൂട്ടി എഡിറ്റര്‍ ആര്‍ രാമദാസ് വ്യക്തമാക്കി.
അതിനിടെ എം സ്വരാജ് ഒരു വിധത്തിലുള്ള പുരസ്‌കാരങ്ങളും സ്വീകരിക്കില്ലെന്നത് വളരെ മുമ്പു തന്നെയുള്ള നിലപാടാണെന്ന് ഫെയ്‌സ്ബുക്കിലൂടെ അറിയിച്ചിരുന്നു. പക്ഷെ പുസ്തകം എഴുത്തുകാരനോ മറ്റാരെങ്കിലുമോ അയച്ചുകൊടുക്കാതെ അവാര്‍ഡ് കിട്ടുമോ എന്ന സംശയവുമായി യൂത്ത് കോണ്‍ഗ്രസ് നേതാവ് താര ടോജോ അലക്‌സ് ഉള്‍പ്പെടെ രംഗത്തെത്തി.
വിമര്‍ശനവുമായി രംഗത്തെത്തിയ താര ടോജോ കേരള സാഹിത്യ അക്കാദമി അവാര്‍ഡുകള്‍ ലഭിക്കുന്നതിന്റെ മാനദണ്ഡങ്ങള്‍ പറഞ്ഞ ശേഷം ആരെങ്കിലും പുസ്തകം അവാര്‍ഡിന് പരിഗണിക്കണമെന്ന് ആവശ്യപ്പെടണമെന്നും വ്യക്തമാക്കുന്നുണ്ട്. താര ടോജോവിന്റെ ഫെയ്‌സ്ബുക് പോസ്റ്റ് ഇങ്ങിനെ: ”കേരള സാഹിത്യ അക്കാദമി അവാര്‍ഡുകള്‍ ലഭിക്കുന്നതിന്റെ മാനദണ്ഡങ്ങള്‍ ഇവയാണ്..
- അപേക്ഷ സമര്‍പ്പിക്കല്‍: നിര്‍ദ്ദിഷ്ട സമയപരിധിക്ക് മുമ്പ് നിങ്ങളുടെ അപേക്ഷ, ആവശ്യമായ രേഖകള്‍ക്കൊപ്പം സമര്‍പ്പിക്കണം.
- സൂക്ഷ്മപരിശോധനാ സമിതി: യോഗ്യതയും പൂര്‍ണ്ണതയും ഉറപ്പാക്കാന്‍ ഒരു സൂക്ഷ്മപരിശോധനാ സമിതി അപേക്ഷകള്‍ അവലോകനം ചെയ്യും.
- . ജൂറി തിരഞ്ഞെടുപ്പ്: പ്രശസ്ത സാഹിത്യ വിദഗ്ധര്‍ അടങ്ങുന്ന ഒരു ജൂറി ഷോര്‍ട്ട്ലിസ്റ്റ് ചെയ്ത അപേക്ഷകള്‍ വിലയിരുത്തും. അവാര്‍ഡ് പ്രഖ്യാപനം: കേരള സാഹിത്യ അക്കാദമി അവാര്‍ഡ് ജേതാക്കളെ തിരഞ്ഞെടുക്കും, അവാര്‍ഡുകള്‍ പ്രഖ്യാപിക്കും. അതായത് ഒരു കൃതി/പുസ്തകം, കേരള സാഹിത്യ അക്കാദമി അവാര്‍ഡിന് പരിഗണിക്കണമെങ്കില്‍ ആദ്യം ആരെങ്കിലും അപേക്ഷ നല്‍കണം. ശ്രീ എം സ്വരാജിന്റെ ‘പൂക്കള്‍’ എന്ന പുസ്തകം അവാര്‍ഡിന് പരിഗണിക്കണമെന്നു അപേക്ഷ നല്‍കിയത് ഒന്നെങ്കില്‍ എം സ്വരാജ് ആയിരിക്കാം അല്ലെങ്കില്‍ പുസ്തകം പബ്ലിഷ് ചെയ്ത സ്ഥാപനമായിരിക്കാം അതുമല്ലെങ്കില്‍ മറ്റേതെങ്കിലും അഭ്യുദയകാംക്ഷിയായിരിക്കാം.ഇനി ഒരു വാദത്തിനു വേണ്ടി, പുസ്തകം പബ്ലിഷ് ചെയ്തവരോ അല്ലെങ്കില്‍ അഭ്യുദയകാംക്ഷിയോയാണ് അവാര്‍ഡിന് അപേക്ഷിച്ചത് എന്ന് കരുതിയാല്‍ തന്നെ, എഴുത്തുകാരന്റെ അറിവോ സമ്മതമോ കൂടാതെ അവര്‍ അപേക്ഷ നല്‍കുമോ?! അവാര്‍ഡിന് അര്‍ഹമായ പുസ്തകം തിരഞ്ഞെടുത്തതിന് ശേഷം അവാര്‍ഡ് കമ്മിറ്റി പുസ്തക രചയിതാവിനെയോ പബ്ലിഷറെയോ അഭ്യുദയകാംക്ഷിയെയൊ ഈ വിവരം ആദ്യം തന്നെ അറിയിക്കാതിരിക്കുമോ? ഇത് തെക്കേടത്തമ്മ / വടക്കേടത്തമ്മ പുരസ്‌കാരം അല്ലല്ലോ. കേരള സാഹിത്യ അക്കാദമി അവാര്‍ഡ് അല്ലേ? അവാര്‍ഡ് വാങ്ങുന്നതും നിഷേധിക്കുന്നതുമൊക്കെ സ്വരാജിന്റെ വ്യക്തിപരമായ തീരുമാനമാണ്. പക്ഷേ ‘അയ്യോ…ഞാന്‍ ഒന്നും അറിഞ്ഞില്ലേ രാമനാരായണ’ എന്ന് സത്യാനന്തര കൊണ മാത്രം അടിക്കരുത്. നാടകമേ ഉലകം.”-താര ടോജോ അലക്‌സ് വിശദീകരിച്ചു. ഇത്തരം രൂക്ഷ വിമര്‍ശനങ്ങളുയര്‍ന്നതിനിടയിലാണ് കൃതി അവാര്‍ഡിന് തെരെഞ്ഞെടുത്തത് തങ്ങള്‍ നേരിട്ടാണെന്ന് കേരള സാഹിത്യ അക്കാദമി തന്നെ വെളിപ്പെടുത്തിയത്.
