കോഴിക്കോട്: കോഴിക്കോട് മെഡിക്കൽ കോളജിൽനിന്ന് വീണ്ടും വേദനപ്പിക്കുന്ന വാർത്ത. ഗർഭപാത്രം നീക്കിയ ശസ്ത്രക്രിയയ്ക്ക് ശേഷം വീണ്ടുമൊരു ശസ്ത്രക്രിയയ്ക്ക് വിധേയയായ പേരാമ്പ്ര സ്വദേശിനി വിലാസിനി(57)യ്ക്ക് ദാരുണാന്ത്യം. ഇന്ന് പുലർച്ചെയാണ് മരണം. മെഡിക്കൽ കോളേജിൽ ശസ്‌ക്രിയയ്ക്കിടെയുണ്ടായ ചികിത്സാപ്പിഴവാണ് മരണത്തിന് ഇടയാക്കിയതെന്ന് കുടുംബം പ്രതികരിച്ചു.
ഗർഭപാത്രം നീക്കുന്നതിനുള്ള ശസ്ത്രക്രിയയ്ക്കിടെ കുടലിനു മുറിവു പറ്റിയെന്നും ഇതാണ് മരണത്തിന് കാരണമായതെന്നും കുടുംബം പറഞ്ഞു. ഗർഭപാത്രം നീക്കുന്നതിന് ഈ മാസം നാലിനാണ് വിലാസിനിയെ മെഡിക്കൽ കോളജ് ആശുപത്രിയിൽ പ്രവേശിപ്പിച്ചത്.
ഏഴിനായിരുന്നു ശസ്ത്രക്രിയ. ശസ്ത്രക്രിയയ്ക്കിടെ കുടലിനു ചെറിയ മുറിവേറ്റെന്ന് ഡോക്ടർമാർ അറിയിച്ചിരുന്നു. തുന്നലുണ്ടെന്നും എന്നാൽ പേടിക്കേണ്ട കാര്യമില്ലെന്നുമാണ് പറഞ്ഞത്. ശേഷം എട്ടാം തിയ്യതി വാർഡിലേക്കു മാറ്റി. ഞായാറാഴ്ച മുതൽ സാധാരണ ഭക്ഷണം നൽകാമെന്നും അറിയിച്ചു.
ഇതനുസരിച്ച് ഭക്ഷണം കഴിക്കാൻ തുടങ്ങിയതോടെ വയറുവേദന കൂടിക്കൂടി വരികയായിരുന്നു. തുടർന്ന് ഐ.സി.യുവിലേക്കു മാറ്റി. തിങ്കളാഴ്ച അണുബാധയുണ്ടായെന്നും ഉടൻ ശസ്ത്രക്രിയ വേണമെന്നും ഡോക്ടർമാർ നിർദേശിച്ചു. ശസ്ത്രക്രിയ നടത്തിയെങ്കിലും ചൊവ്വാഴ്ചയോടെ ആരോഗ്യനില കൂടുതൽ വഷളായി, മറ്റൊരു ആശുപത്രിയിലേക്കു മാറ്റാൻ ശ്രമിച്ചെങ്കിലും സാധിച്ചില്ലെന്നും ഇന്ന് പുലർച്ചെയോടെ മരിക്കുകയായിരുന്നുവെന്നും ബന്ധുക്കൾ പ്രതികരിച്ചു. സംഭവത്തിൽ കോളജ് അധികൃതർക്കും പോലീസിനും പരാതി നൽകുമെന്നും ബന്ധുക്കൾ വ്യക്തമാക്കി.
ഹൃദയസ്തംഭനം മൂലമാണു മരണമെന്ന് ചികിത്സിച്ചവർ പറയുന്നുണ്ടെങ്കിലും ആശുപത്രിയുടെ ഭാഗത്തുനിന്ന് ഇതുവരെയും ഔദ്യോഗിക പ്രതികരണം ലഭിച്ചിട്ടില്ല.