ഗവർണർ ആരിഫ് മുഹമ്മദ് ഖാന്റെ ഷാളിന് തീ പിടിച്ചു; സംഭവം ഗാന്ധി ചിത്രത്തിൽ പുഷ്പാർച്ചന നടത്തവെ

പാലക്കാട്: ഗവർണർ ആരിഫ് മുഹമ്മദ് ഖാന്റെ ഷാളിന് തീ പിടിച്ചു. പാലക്കാട് അകത്തേത്തറ ശബരി ആശ്രമത്തിലെ പരിപാടിക്കിടെയാണ് സംഭവം. ഗാന്ധി ചിത്രത്തിൽ പുഷ്പാർച്ചന നടത്തുന്നതിനിടെ കുനിഞ്ഞപ്പോൾ കത്തിച്ചുവെച്ച വിളക്കിൽനിന്ന് കഴുത്തിലണിഞ്ഞ ഷാളിലേക്ക് തീ പടരുകയായിരുന്നു.

ഉടനെ സുരക്ഷാ ഉദ്യോഗസ്ഥരും സമീപത്തുണ്ടായിരുന്ന മറ്റുള്ളവരും ഇടപെട്ട് കഴുത്തിൽനിന്നും ഷാൾ എടുത്തുമാറ്റി തീ കെടുത്തുകയായിരുന്നു. യഥാസമയം തീ കണ്ടതിനാൽ വൻ അപകടമാണ് ഒഴിവായത്. ശേഷം ഷാളിന് തീ പിടിച്ചതിന്റെ അങ്കലാപ്പൊന്നും കാണിക്കാതെ ഗവർണർ തുടർ പരിപാടികളിൽ പങ്കെടുക്കുകയുണ്ടായി.