തൃശൂർ: ഡയറി എഴുതിയില്ലെന്നു പറഞ്ഞ് തൃശൂരിൽ അഞ്ച് വയസുകാരനെ ക്രൂരമായി മർദ്ദിച്ചെന്ന പരാതിയിൽ അധ്യാപിക അറസ്റ്റിൽ. തൃശൂർ കുര്യച്ചിറ സെന്റ് ജോസഫ് യു.പി സ്‌കൂളിലെ അധ്യാപിക സെലിൻ ആണ് പോലീസ് സ്‌റ്റേഷനിൽ കീഴടങ്ങി അറസ്റ്റ് വരിച്ചത്.
ഡയറി എഴുതിയില്ലെന്നാരോപിച്ച് ക്ലാസ് ടീച്ചറായ സെലിൻ കുട്ടിയുടെ ഇരു കാൽമുട്ടിനും താഴെ ക്രൂരമായി തല്ലുകയായിരുന്നു. നെടുപുഴ പോലീസ് സ്‌റ്റേഷനിലെത്തിയ അധ്യാപികയെ മജിസ്‌ട്രേറ്റിന് മുമ്പാകെ ഹാജരാക്കിയതായി പോലീസ് അറിയിച്ചു.
രക്ഷിതാക്കളുടെ പരാതിയിൽ തിങ്കളാഴ്ച നെടുപുഴ പോലീസ് കേസെടുത്തതിന് പിന്നാലെ ഒളിവിൽ പോയ ടീച്ചർ പിന്നീട് തിരച്ചിലിനിടെ, സ്വമേധയാ കീഴടങ്ങുകയായിരുന്നു. സംഭവത്തിൽ സ്‌കൂൾ മാനേജ്‌മെന്റ് ഒത്തുതീർപ്പിന് ശ്രമിച്ചെന്നും താൻ വഴങ്ങിയില്ലെന്നും രക്ഷിതാവ് പ്രതികരിച്ചുു. മാനേജുമെന്റിന്റെ സ്വാധീനത്തിന് വഴങ്ങി അധ്യാപികയെ അറസ്റ്റ് ചെയ്യുന്നത് വൈകിപ്പിച്ചതായും കുടുംബം ആരോപിച്ചു. അതിനിടെ, അധ്യാപികയെ സസ്‌പെൻഡ് ചെയ്തതായി സ്‌കൂൾ അധികൃതർ പ്രതികരിച്ചു.