തിരുവനന്തപുരം: വി ഡി സവര്ക്കറെ പുകഴ്ത്തിയ വിവാദ ചോദ്യാവലിയില് കര്ശന നടപടിക്ക് നിര്ദേശം നല്കി പൊതുവിദ്യാഭ്യാസ വകുപ്പ് മന്ത്രി എന് ഷംസുദ്ദീന്. അന്വേഷണം നടത്തി കുറ്റക്കാര്ക്കെതിരെ കര്ശന നടപടി സ്വീകരിക്കുവാന് പൊതുവിദ്യാഭ്യാസ ഡയറക്ടര്ക്ക് മന്ത്രി നിര്ദേശം നല്കി. ക്വിസ് മല്സരം സാമൂഹ്യ ശാസ്ത്ര ക്ലബിന്റെയോ വിദ്യാഭ്യാസ വകുപ്പിന്റെയോ പ്രവര്ത്തന കലണ്ടറില് തീരുമാനിക്കാത്ത പരിപാടിയെന്നും വാര്ത്താ കുറിപ്പില് മന്ത്രി വ്യക്തമാക്കി.
കാസര്ഗോഡ്, കുമ്പള, മഞ്ചേശ്വരം ഉപ ജില്ലകളിലെ സ്കൂളുകളില് നടത്തിയ ക്വിസില് വിവാദമുണ്ടായ സാഹചര്യത്തില് അന്വേഷണം നടത്തി കുറ്റക്കാര്ക്കെതിരെ കര്ശന നടപടി സ്വീകരിക്കാനാണ് നിര്ദേശം. ആഗസ്റ്റ് 6 ന് കാസര്ഗോഡ്, കുമ്പള, മഞ്ചേശ്വരം ഉപ ജില്ലകളിലെ സ്കൂളുകളില് ഫ്രീഡം ക്വിസ് എന്ന പേരില് സംഘടിപ്പിച്ച ക്വിസ് മത്സരം സാമൂഹ്യ ശാസ്ത്ര ക്ലബ്ബിന്റെയോ വിദ്യാഭ്യാസ വകുപ്പിന്റെയോ പ്രവര്ത്തന കലണ്ടറില് തീരുമാനിക്കാത്ത പരിപാടിയാണെന്നും ഇത് പോലെ പ്രദേശികമായി അനൗദ്യോഗികമായി ചോദ്യങ്ങള് നിര്മ്മിച്ച് മത്സരം നടത്താന് വിദ്യാഭ്യാസ വകുപ്പും, സാമൂഹ്യ ശാസ്ത്ര ക്ലബ്ബും ആരെയും ചുമതലപ്പെട്ടുത്തിയിട്ടുമില്ലെന്നും വ്യക്തമാക്കി. ചരിത്രത്തിന്റെ പിന്ബലമില്ലാത്ത തെറ്റായ ചോദ്യങ്ങള് ഉള്പ്പെടുത്തിയത് ദോഷൈകദൃഷ്ടിയുള്ളവരാണ്. ഇത്തരത്തില് തെറ്റായ ചോദ്യം തയ്യാറാക്കി മത്സരം നടത്തിയത് ആരെന്ന് അന്വേഷണം നടത്തി കണ്ടു പിടിച്ച്, അവര്ക്കെതിരെ കര്ശന നടപടി സ്വീകരിക്കാനാണ് നിര്ദേശം നല്കിയതെന്ന് കുറിപ്പില് വ്യക്തമാക്കി.
വിഡി സവര്ക്കറുമായി ബന്ധപ്പെട്ട ചോദ്യം വിദ്യാര്ഥികളുടെ ക്വിസ്മല്സരത്തില് ഉള്പ്പെട്ടതില് പരിശോധന നടത്തിയിരുന്നു. കാസര്കോട് ജില്ലാ വിദ്യാഭ്യാസ ഉപഡയറക്ടര് എഇഒമാരോടാണ് റിപ്പോര്ട്ട് തേടിയത്. ബ്രിട്ടീഷുകാരില് നിന്ന് ഏറ്റവും കൂടുതല് ശിക്ഷ ലഭിച്ച സ്വാതന്ത്ര്യ സമര സേനാനി ആരെന്ന ചോദ്യത്തിന് ഉത്തരമായി നല്കിയത് സവര്ക്കറുടെ പേരായിരുന്നു. സംഭവത്തില് പരാതിയുമായി എംഎസ്എഫ് രംഗത്തെത്തി. ഡിഇ ഓഫീസിലേക്ക് ഡിവൈഎഫ്ഐ മാര്ച്ച് നടത്തി.