തിരുവനന്തപുരം: ആലപ്പുഴയിലെ സി.പി.എം നേതാവും ജില്ല പഞ്ചായത്ത് മുൻ വൈസ് പ്രസിഡന്റും സി.പി.എം ഏരിയ കമ്മിറ്റി അംഗവുമായിരുന്ന അഡ്വ. ബിപിൻ സി ബാബു ബി.ജെ.പിയിൽ ചേർന്നു.
തിരുവനന്തപുരത്ത് ബി.ജെ.പി നേതാക്കളായ കെ സുരേന്ദ്രൻ, പി കെ കൃഷ്ണദാസ്, ശോഭാ സുരേന്ദ്രൻ, എ.എൻ രാധാകൃഷ്ണൻ ഉൾപ്പെടെയുള്ള നേതാക്കളുടെ സാന്നിധ്യത്തിലാണ് ബിപിൻ സി ബാബു ബി.ജെ.പിയിൽ ചേർന്നത്. ബി.ജെ.പി അഖിലേന്ത്യാ ജനറൽസെക്രട്ടറി തരുൺ ചൂഗ് ആണ് ബിബിന് അംഗത്വം നൽകിയത്.
പാർട്ടിയിൽ നേരത്തെ അച്ചടക്ക നടപടി നേരിട്ടയാളാണ് ബിപിൻ സി ബാബു. പിന്നീട് നിരവധി കേസുകളിലും മറ്റും ആരോപണങ്ങളുയർത്തി സി.പി.എമ്മിനെ സമ്മർദ്ദത്തിലാക്കിയിരുന്നു. 2023-ൽ ഭാര്യയുടെ പരാതിയെ തുടർന്ന് ആറ് മാസത്തേക്കു സസ്‌പെൻഷനിലായ ബിപിനെ പിന്നീട് പാർട്ടി ബ്രാഞ്ചിലേക്ക് തിരിച്ചെടുത്തിരുന്നു.
ആലപ്പുഴയിലെ സി.പി.എമ്മിൽ പ്രാദേശിക വിഭാഗീയ പ്രശ്‌നങ്ങൾ പുകയുന്നതിനിടെയാണ് നിലവിൽ ജില്ലാ പഞ്ചായത്ത് അംഗം കൂടിയായ പാർട്ടി നേതാവ് ബി.ജെ.പിയിലെത്തിയത്. സി.പി.എമ്മിനെ വർഗീയവാദികളാണ് നിയന്ത്രിക്കുന്നതെന്നും മോഡിയുടെ വികസന പ്രവർത്തനത്തിൽ ആകൃഷ്ടനായാണ് താൻ പാർട്ടി വിട്ടതെന്നും ബിപിൻ സി ബാബു മാധ്യമങ്ങളോട് പറഞ്ഞു.
ആലപ്പുഴ ജില്ലാ പഞ്ചായത്ത് കൃഷ്ണപുരം ഡിവിഷൻ അംഗം, 2021-23 കാലയളവിൽ ജില്ലാ പഞ്ചായത്ത് വൈസ് പ്രസിഡന്റ, മുതുകുളം ബ്ലോക്ക് പഞ്ചായത്തിന്റെ മുൻ പ്രസിഡൻറ്, എസ്.എഫ്.ഐ ആലപ്പുഴ ജില്ലാ സെക്രട്ടറി, പ്രസിഡന്റ്, സ്റ്റേറ്റ് കമ്മിറ്റി മെമ്പർ, ഡി.വൈ.എഫ്.ഐ ജില്ലാ പ്രസിഡന്റ്, സംസ്ഥാന കമ്മിറ്റി അംഗം, കേരള യൂണിവേഴ്‌സിറ്റി സെനറ്റ് അംഗം തുടങ്ങിയ പദവികളും വഹിച്ചിട്ടുണ്ട്.
ഇനിയും കൂടുതൽ നേതാക്കളും പാർട്ടി പ്രവർത്തകരും സി.പി.എം വിട്ട് ബി.ജെ.പിയിലെത്തുമെന്ന് കെ സുരേന്ദ്രൻ അവകാശപ്പെട്ടു.