തിരുവനന്തപുരം: കണ്ണൂർ എ.ഡി.എം നവീൻ ബാബുവിന്റെ മരണവുമായി ബന്ധപ്പെട്ട് നിലമ്പൂർ എം.എൽ.എ പി.വി അൻവർ ഉന്നയിച്ച ആരോപണങ്ങൾക്ക് മറുപടിയുമായി മുഖ്യമന്ത്രിയുടെ പൊളിറ്റിക്കൽ സെക്രട്ടറി പി ശശി.
വസ്തുതയുമായി യാതൊരു ബന്ധവുമില്ലാത്ത നുണകൾ മാത്രം പറഞ്ഞു നിലനില്‌ക്കേണ്ട ഗതികേടിലാണ് പി.വി അൻവർ ചെന്നെത്തിയതെന്ന് പി ശശി പരിഹസിച്ചു. നവീൻ ബാബുവുമായി ജീവിതത്തിൽ ഇന്നേവരെ എന്തെങ്കിലും കാര്യത്തിന് ബന്ധപ്പെടാനോ സംസാരിക്കാനോ ഉള്ള സാഹചര്യം എനിക്ക് ഉണ്ടായിട്ടില്ലെന്നും അദ്ദേഹം ഫേസ്ബുക്കിൽ കുറിച്ചു.
ഒരു തരത്തിലും എനിക്ക് ഒരു ബന്ധവുമില്ലാത്ത നവീൻ ബാബുവുമായി ബന്ധപ്പെടുത്തി എം.എൽ.എ പറഞ്ഞത് നുണകളും ദുരാരോപണങ്ങളുമാണ്. പൊതുസമൂഹത്തിൽ അപമാനിക്കാൻ ശ്രമിച്ചതിന് അൻവറിനെതിരെ നിയമനടപടി സ്വീകരിക്കും. ഇതിനകം അപമാനകരമായ നുണപ്രചാരണങ്ങൾക്കെതിരെ രണ്ട് കേസുകൾ ഫയൽ ചെയ്തതായും ശശി അറിയിച്ചു.
നവീൻ ബാബുവിനെ കൊന്ന് കെട്ടിത്തൂക്കിയതാണെന്നും മുഖ്യമന്ത്രിയുടെ പൊളിറ്റിക്കൽ സെക്രട്ടറിയുടെ ദുരൂഹ ഇടപാടുകൾ നവീൻ ബാബുവിന് അറിയാമായിരുന്നുവെന്നുമാണ് പി വി അൻവർ ഇന്ന് ആരോപിച്ചത്. ശശിയുടെ സമ്മർദ്ദത്തെ കുറിച്ച് നവീൻ ബാബു കുടുംബത്തെ അറിയിച്ചിരുന്നു. ശശിയുടെ പങ്ക് അന്വേഷിക്കണമെന്നാവശ്യപ്പെട്ട് ഹൈക്കോടതിയിലെ കേസിൽ കക്ഷി ചേരുമെന്നും, ശശിയുടെ ഇടപെടൽ കാരണം ജോലി ചെയ്യാൻ നവീൻ ബാബുവിന് ബുദ്ധിമുട്ടുണ്ടായിരുന്നുവെന്നുമാണ് അൻവർ വെളിപ്പെടുത്തിയിരുന്നത്. ഇതിനെതിരേയാണ് ശശി രംഗത്തെത്തിയത്.