തൃശൂർ: തൃശൂർ നാട്ടികയിൽ തടി കയറ്റി വന്ന ലോറി നിയന്ത്രണം വിട്ട് ഉറങ്ങിക്കിടന്നവരിലേക്ക് പാഞ്ഞുകയറി അഞ്ചു പേർക്ക് ദാരുണാന്ത്യം. രണ്ട് കുട്ടികൾ ഉൾപ്പടെ നാടോടികളായ അഞ്ചു പേരാണ് മരിച്ചത്. നാട്ടിക ജെ.കെ തിയ്യേറ്ററിനടുത്താണ് ദാരുണ സംഭവമുണ്ടായത്.
കാളിയപ്പൻ (50), നാഗമ്മ (39), ബംഗാഴി (20), ജീവൻ (4), മറ്റൊരു കുട്ടി എന്നിവരാണ് മരിച്ചത്. ഏഴു പേർക്ക് പരുക്കുണ്ട്. ഇവരെ തൃശൂർ മെഡിക്കൽ കോളേജിലേക്ക് മാറ്റി.
ഇന്ന് പുലർച്ചെ നാലിനാണ് അപകടം. ഡ്രൈവർ ഉറങ്ങിപ്പോയതാകാമെന്നാണ് പ്രാഥമിക നിഗമനം. ഡ്രൈവറെ കസ്റ്റഡിയിലെടുത്തതായി പോലീസ് പറഞ്ഞു.
കണ്ണൂരിൽ നിന്ന് കൊച്ചിയിലേക്ക് പോവുന്ന തടി കയറ്റിയ ലോറിയാണ് അപകടമുണ്ടാക്കിയത്. സംഭവ സ്ഥലത്തുവെച്ചു തന്നെ അഞ്ചുപേരും മരിച്ചതായാണ് വിവരം. കിടന്നുറങ്ങിയ സംഘത്തിൽ പത്തു പേരാണുണ്ടായിരുന്നത്. ബാരിക്കേഡ് മറിഞ്ഞുവന്ന ലോറിയാണ് അപകടമുണ്ടാക്കിയതെന്ന് പോലീസ് പറഞ്ഞു.