ന്യൂഡല്ഹി– ഇടുങ്ങിയ ഒരു മുറിയില് ആറോ ഏഴോ വിദ്യാര്ത്ഥികള്. വൃത്തിഹീനമായ കക്കൂസും കുളിമുറികളും. മെസ് സൗകര്യമില്ല. കിട്ടുന്ന കുടിവെള്ളമാകട്ടെ സുരക്ഷിതല്ലാത്തതും. ഇന്ര്നെറ്റ് സൗകര്യമില്ല. ലൈബ്രറി സംവിധാനവുമില്ല… ബീഹാറിലെ ദര്ഭംഗയിലെ അംബേദ്കര് ഹോസ്റ്റലില് താന് നേരിട്ടുകണ്ട കാഴ്ചകള് ഓരോന്നും അക്കമിട്ടു നിരത്തി പ്രതിപക്ഷ നേതാവ് രാഹുല്ഗാന്ധി പ്രധാനമന്ത്രി നരേന്ദ്രമോദിക്ക് കത്തയച്ചു.
പാര്ശ്വവത്കരിക്കപ്പെട്ട സമുദായങ്ങളില് നിന്നുള്ള 90 ശതമാനം വിദ്യാര്ത്ഥികളുടെയും വിദ്യാഭ്യാസ അവകാശങ്ങളും അവസരങ്ങളും തടസ്സപ്പെടുത്തുന്ന നിര്ണ്ണായക സംഗതികളാണിതെന്നും ഉടന് പരിഹാരം കാണണമെന്നുമാണ് കത്തിലൂടെയുള്ള ആവശ്യം. ദളിത്, എസ്ടി, ഇബിസി, ഒബിസി ന്യൂനപക്ഷ സമുദായങ്ങളില് നിന്നുള്ള വിദ്യാര്ത്ഥികള്ക്കുള്ള റെസിഡന്ഷ്യല് ഹോസ്റ്റലുകളിലെ അവസ്ഥ പരിതാപകരമാണെന്നും അദ്ദേഹം പറഞ്ഞു. പാര്ശ്വവല്ക്കരിക്കപ്പെട്ട ന്യൂനപക്ഷ സമുദായങ്ങളില് നിന്നുള്ള വിദ്യാര്ത്ഥികള്ക്കുള്ള പോസ്റ്റ്-മെട്രിക് സ്കോളര്ഷിപ്പുകള് കിട്ടാതിരിക്കുകയോ കാലതാമസം വരികയോ ചെയ്യുന്നു. വളരെ തുച്ഛമായ സംഖ്യയാണ് സ്കോളര്ഷിപ്പായി നല്കുന്നതെന്നും ഇക്കാര്യത്തിലും അടിയന്തിര ഇടപെടല് വേണമെന്നും അദ്ദേഹം ആവശ്യപ്പെട്ടു.
ബീഹാറില് പലേടത്തും മൂന്ന് വര്ഷമായി സ്കോളര്ഷിപ്പ് പോര്ട്ടല് പോലും കിട്ടാത്ത വിദ്യാര്ത്ഥികളുണ്ട്. പലപ്പോഴും ്അത് പ്രവര്ത്തനരഹിതമായിരുന്നു. കൂടാതെ 2021-22 ല് ഒരു വിദ്യാര്ത്ഥിക്കും സ്കോളര്ഷിപ്പ് ലഭിച്ചില്ല. ശേഷം സ്കോളര്ഷിപ്പുകള് ലഭിക്കുന്ന ദളിത് വിദ്യാര്ത്ഥികളുടെ എണ്ണം പകുതിയായി കുറഞ്ഞു. 2023 സാമ്പത്തിക വര്ഷത്തില് 1.36 ലക്ഷത്തില് നിന്ന് 2024 -ല് 0.69 ലക്ഷമായിട്ടാണ് തുക കുറഞ്ഞത്. വളരെ ദയനീയമാണ് കിട്ടുന്ന സ്കോളര്ഷിപ്പുകളുടെ തുക. ഈ സാഹചര്യം ഒരിക്കലും ഉണ്ടായിക്കൂടാ. ഈ രണ്ട് വിഷയങ്ങളിലും ഉടന് നടപടികള് സ്വീകരിക്കണം. നല്ല അടിസ്ഥാന സൗകര്യങ്ങളും ശുചിത്വവും കുടിവെള്ളവും ഭക്ഷണവും മറ്റ് അക്കാദമിക് സൗകര്യങ്ങളും ഉണ്ടോ എന്ന് ഉറപ്പാക്കാന് ദലിത്, എസ്ടി, ഇബിസി, ഒബിസി, ന്യൂനപക്ഷ സമുദായങ്ങളിലെ വിദ്യാര്ത്ഥികളുടെ ഹോസ്റ്റലുകളും സ്ഥാപനങ്ങളും ഓഡിറ്റ് നടത്തണമെന്നും രാഹുല്ഗാന്ധി ആവശ്യപ്പെട്ടു. സ്കോളര്ഷിപ്പ് രംഗത്തെ പോരായ്മകള് പരിഹരിക്കുന്നതിന് മതിയായ ഫണ്ട് അനുവദിക്കണം. പോസ്റ്റ്-മെട്രിക് സ്കോളര്ഷിപ്പുകള് സമയബന്ധിതമായി വിതരണം ചെയ്യുകയും സ്കോളര്ഷിപ്പ് തുകകള് വര്ധിപ്പിക്കുകയും വേണം. ഇക്കാര്യങ്ങളില് സംസ്ഥാന സര്ക്കാരുമായി ചേര്ന്ന് പരിഹാരം ആവശ്യമാണെന്നും അദ്ദേഹം വിശദീകരിച്ചു.