ന്യൂദല്‍ഹി -അദാനിക്കെതിരായ കല്‍ക്കരി വിവാദം ബി ജെ പിക്കെതിരെ ആയുധമാക്കി രാഹുല്‍ ഗാന്ധി. ഗുണനിലവാരം കുറഞ്ഞ കല്‍ക്കരി ഉയര്‍ന്ന നിലവാരത്തിലുള്ളതെന്ന് കാണിച്ച് ആദാനി ഗ്രൂപ്പ് കൂടിയ വിലക്ക് വിറ്റെന്ന ഫിനാന്‍ഷ്യല്‍ ടൈംസ് പത്രത്തിലെ റിപ്പോര്‍ട്ടാണ് ബി ജെ പിക്കെതിരെ ആയുധമാക്കുന്നത്. ജൂണ്‍ നാലിന് ‘ ഇന്ത്യ ‘ സഖ്യ സര്‍ക്കാര്‍ അധികാരത്തില്‍ വരുന്‌പോള്‍ ഈ അഴിമതികളെല്ലാം അന്വേഷിക്കുമെന്ന് രാഹുല്‍ പറഞ്ഞു.
ഇന്തോനേഷ്യയിലെ ഗുണനിലവാരം കുറഞ്ഞ കല്‍ക്കരി അദാനി ഗ്രൂപ്പ് തമിഴ്‌നാട്ടിലെ പൊതുമേഖല സ്ഥാപനത്തിന് ഉയര്‍ന്ന നിലവാരമുള്ളതെന്ന കാണിച്ച് മറിച്ച് വിറ്റുവെന്നാണ് വിദേശമാധ്യമമായ ഫിനാഷ്യല്‍ ടൈംസ് റിപ്പോര്‍ട്ട് ചെയ്യുന്നത്. ഇതിലൂടെ അദാനിയുടെ കമ്പനി കൊള്ള ലാഭം ഉണ്ടാക്കി. ഇന്ത്യയില്‍ വര്‍ഷം തോറും രണ്ട് ദശലക്ഷം ആളുകള്‍ വായു മലിനീകരണം കൊണ്ടു മരിക്കുന്നുവെന്ന കണക്കും ചൂണ്ടിക്കാട്ടിയായിരുന്നു ഫിനാന്‍ഷ്യല്‍ ടൈംസിന്റെ റിപ്പോര്‍ട്ട്. ഇതാണ് രാഹുല്‍ഗാന്ധി ബി ജെ പിക്കെതിരെ ഉന്നയിച്ചത്. പുറത്ത് വന്നത് ബിജെപി സര്‍ക്കാരിന്റെ വലിയ തട്ടിപ്പാണെന്ന് രാഹുല്‍ ഗാന്ധി ആരോപിച്ചു. യഥാര്‍ത്ഥ വിലയുടെ മൂന്നിരിട്ടി തുക ഈടാക്കി അദാനി ലാഭം കൊയ്തു. ഈ പണം സാധാരണക്കാരന്റെ പോക്കറ്റില്‍ നിന്ന് കൂടിയ വൈദ്യുതി ബില്ലായാണ് നഷ്ടമായെതന്നും രാഹുല്‍ഗാന്ധി ആരോപിച്ചു. ഈ അഴിമതി അന്വേഷണ ഏജന്‍സികളില്‍ നിന്ന് മൂടി വെക്കാന്‍ എത്ര പണം ലഭിച്ചുവെന്ന് മോഡി പറയണമെന്നും രാഹുല്‍ ആവശ്യപ്പെട്ടു. പൊതു ജനങ്ങളില്‍ നിന്ന് കൊള്ളയടിച്ച പണത്തെ കുറിച്ച് ‘ഇന്ത്യ’ സര്‍ക്കാര്‍ അധികാരത്തില്‍ വരുമ്പോള്‍ അന്വേഷിക്കുമെന്നും അദ്ദേഹം വ്യക്തമാക്കി.